"Огцрох амархан" жагсаал өнөөдөр найм дахь өдрөө 16:00-20:00 цагийн хооронд Сүхбаатарын талбайд үргэлжилнэ
Ерөнхий сайд Л.Оюун-Эрдэнийг огцруулах зорилго бүхий "Огцрох амархан" жагсаал өнөөдөр найм дахь өдрөө 16:00-20:00 цагийн хооронд Сүхбаатарын талбайд буюу Чингис хааны хөшөөний чанх урд үргэлжлэх гэж байна.
Өдрөөс өдөрт үзэл бодлоороо нэгдэн нийлж жагсаалд нэмэгдэж буй залуус татварын дарамтад орж бизнес нь дампуурсан бизнес эрхлэгчид, оюутнууд, УИХ-ын гишүүд гээд хүн бүрийг ирж нээлттэй микрофонд үгээ хэлэн хамтдаа жагсахыг уриалж байгаа билээ. Өнөөдрийн тухайд гэрэл зураг дардаг залуучуудыг жагсаалд оролцож өөрийн өнгө төрх, өнцгөөс түүхийг хамт бичилцэхийг уриалж байгаа юм байна.
Түүнчлэн өчигдрөөс эхлэн жагсаалыг зохион байгуулагчдын зүгээс Ерөнхий сайд Л.Оюун-Эрдэнэ өөрийн хүсэлтээр огцрох санаачилга үл гаргах тохиолдолд Үндсэн хуулийн 43.1-т заасан эрх хэмжээг хэрэгжүүлж, Улсын Их Хурлын гишүүдийн Ерөнхий сайдыг огцруулах албан саналд нэгдэж гарын үсгээ зурах шаардлагыг УИХ-ын гишүүдэд хүргүүлээд байгаа юм.
Одоогоор тус албан саналд Ж.Баярмаа, С.Цэнгүүн, Ж.Золжаргал, Ч.Лодойсамбуу, Ш.Бямбасүрэн, Д.Ганбат нарын УИХ-ын гишүүд нэгдэж гарын үсгээ зураад байгаа юм. Түүнчлэн уг санаачилгад иргэдийг өөрийн тойргоос сонгосон, таныг төлөөлөн УИХ-д сууж байгаа гишүүдийг нэгдэхийг уриалж утас руу нь мессэж илгээхийг уриалаад байгаа юм.
Иргэдийн зүгээс Ерөнхий сайд Лувсаннамсрайн Оюун-Эрдэнэ улс төрийн болоод ёс зүйн хариуцлага хүлээж өөрийн хүсэлтээр огцрохыг нэн түрүүнд шаардаж байгаа юм. Удаах нь дараагийн шинэ Засгийн Газрыг эвслийн Засгийн Газар байгуулахыг дэмжихгүй, албан тушаалтны бус тогтолцооны тогтвортой байдлыг дэмжиж, Үндсэн Хуульд өөрчлөлт оруулахгүй байхыг шаардан жагсаж байгаа билээ.
Жагсаалыг зохион байгуулагчид "...Хэцүү, бас тухгүй! Гэлээ гээд тэмцэхгүй байх нь, байгаа нийгмээ өөрчлөхгүй, шударга бустай зэрэгцэн, хүлцэн амьдрах нь энэ бүхнээс илүү тухгүй, огиудас хүргэм гэдгийг мэдэх учраас ОГЦРОХ хүртэл, ёс зүйгүй улс төрч нар тогтмол ОГЦОРДОГ СОЁЛ тогтох хүртэл шаардлагатай өдөр бүр жагсахдаа бэлэн байгаа..." гэж цахим хуудаснаа бичжээ.
Өнөөдөр 16:00 цагаас эхлэх жагсаалын хөтөлбөр:
Өчигдрийн жагсаалын хэсгээс:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
