Ирэх хичээлийн жилээс 3-4 дүгээр ангид англи хэл заах бэлтгэлийг хангаж, багш нарт сургалт зохион байгуулах үүрэг өгчээ

Боловсролын сайдын өргөтгөсөн хуралдаан өчигдөр болжээ.

Хурлыг нээж Боловсролын сайд П.Наранбаяр 2026 оныг "Боловсролыг дэмжих жил" болгож байгаатай холбогдуулан хийхээр төлөвлөж буй ажлуудын талаар мэдээлэл хийж, ойрын хугацаанд анхаарах асуудлуудаар чиглэл, үүрэг даалгавар өглөө.

Тухайлбал

• уртасгасан цагаар ажиллаж байгаа цэцэрлэгийн хүүхдийн хоолны асуудлыг судлан шийдвэрлэх,
• орон нутгийн хувийн өмчийн цэцэрлэг, ерөнхий боловсролын сургуулиудын тусгай зөвшөөрөл, хувьсах зардалтай холбоотой үүсээд байгаа асуудлыг судлан шийдлийг танилцуулах,
• хойд бүсэд (Орхон аймагт) багшийн хөгжилд дэмжлэг үзүүлэх төвийг байгуулах,
• ирэх хичээлийн жилээс эхлэн 3-4 дүгээр ангид англи хэл заах бэлтгэлийг хангаж, холбогдох тушаалыг батлуулах, багш нарын сургалтыг МУБИС болон бусад байгууллагатай хамтран эхлүүлэх, бэлтгэл хангах,
• цэцэрлэг, ерөнхий боловсролын сургуулийн багшийн хомсдолыг бууруулахад орон нутаг, боловсролын сургалтын байгууллага санаачилга гарган анхаарч ажиллах, үүнтэй холбогдуулан багш бэлтгэх их, дээд сургуультай хамтран “Багшлах эрх олгох” сургалтыг орон нутагт зохион байгуулах зэрэг 20 гаруй чиглэлээр үүрэг өгсөн юм.

Өргөтгөсөн хуралдаанд Боловсролын Яам болон харьяа байгууллагын холбогдох албан тушаалтнуудаас гадна есөн дүүргийн Боловсролын газрын дарга нар биечлэн, 21 аймгийн Боловсролын газрын дарга нар цахимаар оролцсон бөгөөд цаашид сар бүр болох аж. 

Эх сурвалж: Боловсролын Яам