Баян-Өлгий, Баянхонгор, Сүхбаатар аймгийн хүүхдүүдийн англи хэлний чадварыг дээшлүүлэх хөтөлбөр хэрэгжүүлнэ

Британийн Засгийн газрын санхүүгийн дэмжлэгээр Боловсролын яам, НҮБ-ын Хүүхдийн Сан хамтран Баян-Өлгий, Баянхонгор, Сүхбаатар аймгийн хүүхдүүдийн англи хэлний чадварыг дээшлүүлэх хөтөлбөр хэрэгжүүлэх тухай гэрээнд өчигдөр гарын үсэг зурлаа.

Тус хөтөлбөрийн хүрээнд:

• 320 багшийг англи хэл заах сургалтад хамруулах
• 12,000 гаруй бага ангийн хүүхдэд чанартай англи хэлний боловсрол олгох
• Алслагдмал орон нутагт тохирох заах арга зүйн судалгаа хийж, цаашдын ажлуудыг тодорхойлох зэрэг ажлыг тус тус хэрэгжүүлнэ хэмээн Нэгдсэн Үндэстний Байгууллага(НҮБ)-ын Хүүхдийн сангаас мэдээлэв.

Эргэн сануулахад Их Британийн Гадаад Хэрэг, Хамтын Нөхөрлөл, Хөгжлийн Яамны Энэтхэг-Номхон Далайн бүс нутгийн асуудал эрхэлсэн Төрийн сайд Катрин Вест өнгөрсөн оны наймдугаар сард манай улсад айлчлахдаа Их Британи улс Монголын орон нутгийн Англи хэлний багш нарыг бэлдэх тэтгэлэгт хөтөлбөрт 500,000 фунт стерлингийг зориулахаа мэдэгдэж байв.