"Өчигдөр мэдээлэл хийсэн иргэний бичлэгт тодорхой алба хаагчийн нэрийг дурдаагүй учир дотоод хяналт шалгалтыг эхлүүлсэн"
"Ноорог" пэйжийн ажилтан А.О-н ар гэрээс олон нийтийн цахим сүлжээгээр дамжуулан хийсэн мэдээлэлтэй холбогдуулан цагдаагийн байгууллагаас өнөөдөр хэвлэлийн хурал хийлээ.
Цагдаагийн Ерөнхий Газар(ЦЕГ)-ын Кибер гэмт хэрэгтэй тэмцэх хэлтсийн дарга, хурандаа С.Тайван Монгол Улсын иргэдийн зохион байгуулдаг цахим мөрийтэй тоглоомын бүлэглэлүүдийн талаар дараах мэдээллийг өглөө.
Цагдаагийн байгууллагаас сүүлийн дөрвөн жилд мөрийтэй тоглоом зохион байгуулахтай холбоотой 1,360 хэрэг бүртгэлд мөрдөн шалгах ажиллагаа явуулснаас 365 хэрэгт эрүүгийн хэрэг үүсгэж яллагчдаар татан шүүхэд шилжүүлэх саналтай прокурорт хүргүүлсэн байна. Үүнээс 299 хэргийг шүүхээр эцэслэн шийдвэрлэжээ.
Энэ төрлийн гэмт хэрэг нь үндэстэн дамнасан зохион байгуулалттайгаар олон хүний оролцоотой хийгддэг ба Монгол Улсын иргэд сүүлийн жилүүдэд энэ төрлийн гэмт хэргийг гадаад улсаас үйлдэх болсон байна. Тус бүлэглэлүүдийн талаар дараах мэдээллийг өглөө.
- МУ-ын иргэн Э-гийн бүлэглэл буюу 35 хүнтэй бүлэглэл байна. Тус бүлэглэлийг гадаад улсаас энэ төрлийн гэмт хэргээ үйлдэж байхад нь цагдаагийн байгууллагаас шувуу ажиллагааны хүрээнд албадан баривчилж монголд авчирсан.
- 28 хүний бүрэлдэхүүнтэй Г-ийн бүлэглэлд мөрдөн шалгах ажиллагаа явагдаж, хоёр этгээд нь цагдан хоригдоод шалгагдаж байгаа.
- Өчигдөр орой хэвлэл мэдээллийн хэрэгслээр мэдээлэл хийсэн Баяржавхлан гэх хүний хамаарал бүхий 18 хүн оролцсон бүлэглэл нь Б-гийн бүлэглэл юм байна. Тус бүлэглэл нь гадаад улсаас энэ төрлийн гэмт хэргийг үйлдэж байгаа гэдэг нь өчигдрийн мэдээллээр тогтоогдож байна гэв.
Цагдаагийн байгууллагаас 2023 оноос хойш "Торгоны зам" нэртэй мөрийтэй тоглоомтой холбоотой таван иргэний 10 дансыг, "Хос тамга" нэртэй мөрийтэй тоглоомтой холбоотой 11 иргэний 20 дансанд хязгаарлалт тогтоож ажилласан байна.
Өчигдөр цахим орчинд мэдээлэл хийсэн Баяржавхлан гэх иргэний төрсөн хоёр дүү О,Б нар нь шүүгчийн захирамжаар цагдан хоригдоод байгаа юм байна. Тус этгээдүүдийг мөрийтэй тоглоом зохион байгуулах, гэмт бүлэг үүсгэх, мөнгө угаах гэсэн гурван төрлийн гэмт хэрэгт мөрдөн шалгах ажиллагаа явуулж байгаа юм байна. Тухайн хэрэгтэй холбоотойгоор гурван хүн цагдан хоригдоод байгаа ба Б гэх иргэн нь 2010-2019 онд цагдаагийн байгууллагад ажиллаж байсан юм байна.
"Цагдаагийн алба хаагч Болдбаатар, Тэмүүлэн нарын асуудлыг найман сарын хугацаанд шалгаж, гэм буруугүйг нь тогтоосон"
ЦЕГ-ын газрын дэд дарга, хурандаа Н.Мөнхзул "Өчигдөр "Адьяабазар Баяржавхлан" гэх нэртэй фэйсбүүк хаягаас цагдаагийн алба хаагчтай холбоотой ноцтой мэдэгдлийг хийсэн. Энэ мэдээлэлтэй холбогдуулан ЦЕГ-ын Дотоод хяналт аюулгүй байдлын газраас ажлын хэсэг гарган тухайн алба хаагчтай холбоотой дотоод хяналт шалгалтыг эхлүүлсэн.
Тухайн иргэний мэдээлэлд дурдагдсан "Цагдаагийн шуурхай хуралтай холбоотой мэдээллийг над руу явуулсан" гэх мэдээллийг нягталж үзэхэд тус бичлэг нь 2024 оны есдүгээр сард цагдаагийн байгууллагаас хийсэн "Хянамгай бай" гэх ажил, арга хэмжээний тухай манай алба хаагчийн хэвлэлийн бага хурлын үеэр өгсөн мэдээлэл байна. Үүнийг цагдаагийн алба хаагч шуурхай хуралдааны мэдээллийг явуулсан гэх байдлаар мэдээлсэн байна.
Тухайн мэдээлэлд алба хаагчийн нэрийг тодорхой дурдаагүй учраас бид холбогдох байгууллагын албан тушаалтнуудад хяналт шалгалт хийгээд эхэлсэн. Цахим орчинд мэдээлэл хийсэн Баяржавхлан гэх иргэнээс харилцаа холбооны ямар ч хэрэгслийг ашиглаад цагдаагийн алба хаагчтай холбоотой хууль бус үйлдлийн мэдээлэл байх юм бол түүнийгээ ирүүлэх боломжтой.
Цагдаагийн байгууллагаас баримталж буй бодлого нь хууль бус үйлдэл хийсэн, гэмт хэрэг, зөрчил хийсэн алба хаагчтай эвлэрэхгүй хариуцлагыг нь тооцуулна. Дотоод хяналт шалгалтаараа тогтооно. Шаардлагатай бол харьяа байгууллагатай нь холбоотойгоор шалгуулна. Харин тухайн алба хаагч нь буруутай нь тогтоогдоогүй бол хууль ёсны эрх ашгийг хамгаалан ажиллана.
Зохион байгуулалтай гэмт хэрэгт холбогдон шалгагдаж байгаа хүмүүсээс хэвлэл мэдээллийн хэрэгслийг ашиглан буруу зөв мэдээлэл өгч мөрдөн байцаах ажиллагаанд нөлөөлөх оролдлого байна гэж харж байна. Тухайлбал Болдбаатар, Тэмүүлэн гэх манай хоёр алба хаагч цахим мөрийтэй тоглоомын ард байдаг гэх мэдээлэл хэвлэл мэдээллийн хэрэгслээр явж байна. Үүнийг 2023 оны арваннэгдүгээр сараас эхлээд 2024 оны долдугаар сар хүртэл АТГ прокурорын хяналт дор шалгаж, гэм буруугүй нь тогтоогдсон" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
53 СЭТГЭГДЭЛТЭЙ
|
