ҮСХ: НДШ төлөгчдийн 50 хувь нь 2.2 сая төгрөгөөс бага цалинтай байна

Гэрэл зургийг MPA агентлагийн онцгой зөвшөөрөлтэйгөөр ашиглав

Нийгмийн Даатгалын Ерөнхий Газар(НДЕГ)-ын нийгмийн даатгалын шимтгэл төлөлтийн тайланд 2024 оны дөрөвдүгээр улирлын байдлаар нийт 52,700 аж ахуйн нэгж, байгууллага (ААНБ)-ын 787,400 ажиллагч хамрагдсан байна.

Нийгмийн даатгалын шимтгэл (НДШ) төлсөн ААНБ-ын тоо өмнөх оны мөн үеэс 1,600, өмнөх улирлаас 707-гоор тус тус өсөж, ажиллагчдын тоо өмнөх оны мөн үеэс 16,300 өсжээ.

Улсын хэмжээнд 2024 оны дөрөвдүгээр улирлын байдлаар нэг ажилтанд ногдох сарын дундаж нэрлэсэн цалин 2,672,000 төгрөг, голч цалин 2,229,000 төгрөг байна. Өмнөх оны мөн үетэй харьцуулахад сарын дундаж нэрлэсэн цалин 19.5 хувь, голч цалин 25.1% хувиар тус тус нэмэгджээ.

Зураг 1, Ажиллагчдын сарын дундаж нэрлэсэн болон голч цалин, улирлаар

 

Бодит цалингийн индексийг салбараар,өмнөх оны мөн үетэй харьцуулахад олон улсын байгууллага, суурин төлөөлөгчийн болон уул уурхай, олборлолтын үйл ажиллагааны салбарт ажиллагчдынх 2.3-8.4 хувиар буурч, бусад салбарынх 8.9-27.7 хувиар өсжээ.Үүний дотор ус хангамж, бохир ус, хог хаягдал, үйлчилгээний бусад салбар, хүн хөлслөн ажиллуулах өрхийн үйл ажиллагааны салбарт ажиллагчдынх хамгийн их буюу 20.2-27.7хувиар өссөн байна. 

Зураг 2, Ажиллагчдын тоо, цалингийн бүлэг, улирлаар

 

Ажиллагчдын тоог цалингийн бүлгээр харвал нийт даатгуулагчийн дотор 2-3 сая төгрөгийн цалинтай ажиллагчдын эзлэх хувь хамгийн их буюу 25.8 хувь, харин 550 мянган төгрөг хүртэлх цалинтай ажиллагчдын эзлэх хувь 2.4 буюу хамгийн бага байна.

Зураг 3, Ажиллагчдын сарын дундаж нэрлэсэн цалин, улирлаар

 

Түүнчлэн ажиллагчдын сарын дундаж нэрлэсэн цалин тухайн байгууллагын ажиллагчдын тооноос шууд хамаарч байна. Өөрөөр хэлбэл ажиллагчдын тоо ахих тутам сарын дундаж цалин нэмэгдэж байна. 

Мөн НДШ төлөгчдийн 50 хувь нь 2.2 сая төгрөгөөс багаар цалинжиж байгааг Үндэсний Статистикийн Хорооноос мэдээллээ.