"32,000 зуухыг нийлүүлэх тендерт шалгарсан Экоресурс компанитай гэрээ байгуулахаас татгалзсан"

Гэрэл зургийг MPA агентлагийн онцгой зөвшөөрөлтэйгөөр ашиглав

Гэр хорооллын 32,000 айлд зуух тараахаар болж, 28 тэрбум төгрөгөөр зуух худалдаж авах тендер зарласан болохыг өнгөрсөн сард Нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин мэдээлж байв. Уг тендерийг цуцалжээ.

Энэ талаар Нийслэлийн Агаарын Бохирдолтой Тэмцэх Газраас тодруулахад "32,000 зуухыг нийлүүлэх тендерт "Экоресурс" гэж компани шалгарсан юм. Тус компанитай гэрээ байгуулахаас татгалзсан. Утааны асуудлын хэлэлцүүлэгт оролцсон болон нийт иргэдийн зүгээс зуухнаас өөр шийдлийг нэвтрүүлэх тухай санал, шүүмжлэл гарлаа. Энэ тухай мэдэгдлийг "Экоресурс" компанид хүргүүлсэн, хариу ирээгүй байна.

2024 онд эрүүл мэндийн байгууллагад угаарын 2,000 гаруй дуудлага ирсний 893 нь зуухны эвдрэл гэмтлээс болсон нь тогтоогдсон. Эдгээр угаарын дуудлагын шалтгааны 50-аас дээш хувийг зуухны битүүмж алдагдсан, яндангийн эвдрэл гэмтэл эзэлсэн байдаг. Үүнээс гадна хяналт шалгалтаар нийслэлийн гэр хорооллын айл өрхийн 70,000 гаруй нь уламжлалт болон эвдэрхий зуухтай байсан. Энэ тооцооллын дагуу иргэдийн амь нас, эрүүл мэндийг угаартах эрсдэлээс хамгаалах зорилгоор Нийслэлийн Агаарын Бохирдолтой Тэмцэх Газраас зуухны тендерийг зарласан юм" гэж тайлбарлалаа.

Угаарын хий буюу СО гэж нүүрстөрөгчийн дутуу ислийг хэлдэг бөгөөд дотоод орчинд угаараар амьсгалбал хүний биед хамгийн хортой байна. Хими, химийн технологийн үндэсний хүрээлэнгээс "Экоресурс" компанийн нийлүүлдэг "Нүүдэлчин" нэртэй зуухыг энэхүү нүүрстөрөгчийн давхар ислийг бүрэн шатаадаг гэсэн дүгнэлт гарчээ.