Э.Ниндэв: Тээврийн хэрэгсэл нь хайбрид хөдөлгүүртэй ч бензин гэж бүртгэгдсэний улмаас 15 оноо бодогдсон тохиолдол гарсан
Автотээврийн Хэрэгслийн Бүртгэл, Хяналтын Төвөөс тээврийн хэрэгсэлд Улаанбаатарын серитэй улсын дугаар олгох хүсэлтийг авах carplate.ulaanbaatar.mn системийг танилцуулж, 2025 оны нэгдүгээр сарын 15-наас албан ёсоор нээгээд байгаа билээ.
"Системд тээврийн хэрэгслийн арлын дугаарыг оруулснаар шалгуурын дагуу оноо автоматаар бодогдоно. Хамгийн бага насжилттай/он залуу/, цахилгаан болон хайбрид хөдөлгүүртэй, зүүн гар талдаа жолооны хүрдтэй тээврийн хэрэгсэл хамгийн өндөр оноо авна" гэж танилцуулаад буй.
Гэтэл бодит байдал дээр хайбрид хөдөлгүүртэй тээврийн хэрэгсэлд 15 оноо өгч, бензин, дизель хөдөлгүүртэйгийн хойно оруулж бүртгэж байна гэх мэдээлэл ирсэн юм.
Энэ тухай Автотээврийн Хэрэгслийн Бүртгэл, Хяналтын Төвийн дарга Э.Ниндэвээс тодруулж асуухад "carplate.ulaanbaatar.mn системд тээврийн хэрэгслийн арлын дугаарыг оруулахад тухайн тээврийн хэрэгсэл нь оношилгоонд орсон бол системээс бензин, хайбрид, дизель хөдөлгүүртэйг ялгаж оноо бодогддог. Хүн программ дээр бодож, оноо өгдөггүй.
100% цахилгаан, хосолсон хөдөлгүүртэй тээврийн хэрэгсэлд 20, бензин, дизель хөдөлгүүртэй машинд программаас тус бүр 15 оноо бодогдож, цахилгаан болон хосолсон хөдөлгүүртэй тээврийн хэрэгсэл нь бензин, дизель хөдөлгүүртэй тээврийн хэрэгслийн өмнө эрэмбэлэгдэж байгаа юм.
Гэвч тухайн тээврийн хэрэгсэл нь хайбрид хөдөлгүүртэй ч бензин гэж бүртгэгдсэний улмаас 15 оноо бодогдсон 2-3 удаагийн тохиолдол гарсан. Энэ тохиолдолд тухайн иргэн гаалийн бичиг болон техникийн хяналтын үзлэгийн бүртгэл дээр тээврийн хэрэгслийн хөдөлгүүрийг бензин, бензин цахилгаан хосолмол алинаар нь бүртгэснийг харж, механик алдаа гарсан газарт техникийн паспортоо авч очиж засуулах хэрэгтэй.
Тээврийн хэрэгслийн хамгийн анхны бүртгэлийг гаалийн байгууллага, тус байгууллагын бүртгэлийг үндэслэж техникийн хяналтын үзлэгийн төв бүртгэдэг юм. Тэгэхээр энэ хоёр байгууллагад хандана.
Автотээврийн Хэрэгслийн Бүртгэл, Хяналтын Төвтэй 70111113 дугаарын утсанд хандаж тээврийн хэрэгсэлд Улаанбаатарын серитэй улсын дугаар олголтын талаар лавлах боломжтой" гэж тайлбарлалаа.
УБ серитэй улсын дугаар авах гэж байгаа тээврийн хэрэгслийг оношилгоонд буюу техникийн хяналтын үзлэгт заавал оруулсан байх ёстой шалгуур тавигдаж байгаа аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
17 СЭТГЭГДЭЛТЭЙ
|
