М.Энхцэцэг: Эрчим хүчний салбарт хуулиас давсан журам их болжээ. Захын дарга журам гаргаад хүнээс мөнгө хурааж байна

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын өнөөдрийн хуралдаанаар эрчим хүчний реформын асуудлыг хэлэлцжээ.

Энэ талаар өнөөдөр Эрчим хүчний үндэсний хорооноос мэдээлэл хийлээ.

Улсын Их Хурал(УИХ)-ын гишүүн, Эрчим хүчний үндэсний хорооны дэд дарга М.Энхцэцэг "Реформын нэг чухал асуудал хуулийн шинэчлэлт. Эрчим хүчний тухай хууль 2001 онд батлагдаж эрчим хүчний реформыг анх удаа хийж байв.

Тэр үед дөрвөн зорилготой байлаа.

• Босоо бүтэцтэй байсан компаниудыг хэвтээ болгож, дамжуулах, түгээх, үйлдвэрлэх гэж олон компани болгон салгасан
• Эрчим хүчний зохицуулах хороог байгуулж, үнэ тарифыг хараат бусаар зохицуулдаг болгосон
• Хувийн хэвшлийн оролцоог нэмэгдүүлэх байв. Гэвч хийж чадаагүй.
• Өрсөлдөөнийг бий болгох байсан ч мөн хэрэгжүүлж чадаагүй 24 жил өнгөрчээ.

Реформыг системтэйгээр цаг хугацаанд нь дахин шинэчилж хараагүй, улс төрийн оролцоо зэрэг олон шалтгааны улмаас энэ салбар хямралынхаа дээд цэгт хүрлээ. Иймд "Реформ 2"-ыг хэрэгжүүлэх шаардлагатай. 2025 онд реформыг хэрэгжүүлэхийн тулд хуулийн эрх зүйн орчныг шинэчлэх зорилт тавьсан.

Шинэчлэн боловсруулагдах хуулийн төсөл нь эрчим хүчний салбарт

1. Үйлдвэрлэгч талд өрсөлдөөнийг бий болгох
2. Хувийн хэвшлийн оролцоог нэмэгдүүлэх
3. Ногоон шилжилтийг дэмжих
4. Бүтцийн өөрчлөлт хийж, босоо удирдлагын тогтолцоог засаж залруулах
5. Хараат бус байдлыг дэмжих зорилготой.  

Түүнчлэн эрчим хүчний салбарын хуулиудыг шинэчлэхийн тулд хэрэгжиж буй хуулийн үнэлгээг хийж байгаа. Хууль маш товч, ерөнхий байснаараа хуулиас давсан журам их болжээ. Захын дарга хуулиас давсан журам батлаад хүнээс мөнгө хураагаад сууж байна. Иймд энэ салбарт байгаа бүх журмыг судлаад ямар заалтыг хуульд оруулах вэ, ямар нь журмаар зохицуулагдах вэ гэдгийг тодорхойлно" гэв.