ИНФОГРАФИК: 2000 оноос хойш нийслэл Улаанбаатар хотод 665 мянган хүн шилжин иржээ

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэл хот үүсгэн байгуулагдсаны 385, нийслэл хотоо Улаанбаатар хэмээн нэрлэсний 100 жилийн ой тохиож байна.

Утаа, түгжрэл, өмхий үнэр нэмээд хөрс, усны бохирдол… Энэ бол зуу гаруй жилийн түүхтэй Улаанбаатар хотын иргэдийг хамгийн ихээр стресстүүлж бухимдуулж буй хүчин зүйлс юм. Нийслэл хотын хүн ам хэт ихсэж, хот ачааллаа дийлэхгүй болсноос эдгээр сөрөг үр дагаврууд үүсэж буй.

Тэгвэл Улаанбаатар хотын хүн ам хэрхэн өөрчлөгдөж ирсэн болон нийслэл хотын шилжилт хөдөлгөөний талаарх дэлгэрэнгүй мэдээллийг Статистикийн мэдээллийн нэгдсэн сангийн тоон мэдээлэлд үндэслэн нэгтгэн хүргэе.

График №1. Монгол Улсын нийт хүн ам ба Улаанбаатар хотын хүн амын тоо /1935-2023 он/

Нийслэл хотод амьдрах иргэдийн нийт хүн амд эзлэх хувь жил ирэх тутамд нэмэгдэж байгаа.

Улаанбаатар хотын газар нутгийн хэмжээ Монгол Улсын нийт нутаг дэвсгэрийн 0.3 хувийг эзэлдэг ба Статистикийн мэдээллийн нэгдсэн сангийн тайланд дурдсанаар 2023 оны байдлаар Монгол Улсын нийт хүн амын 49.5 хувь нь нийслэл хотод амьдарч байна гэжээ.

400-500 мянган хүн амьдрах дэд бүтэцтэй анх төлөвлөгдсөн гэгддэг нийслэл хотод өнгөрөгч оны байдлаар 1.73 сая хүн амьдарч байгаа бөгөөд сүүлийн 20 гаруй жилийн хугацаанд нэг сая хүнээр нэмэгдсэн аж.

Тэгвэл "Монгол Улсын хүн амын дотоод шилжих хөдөлгөөн, түүнд нөлөөлөх татах, түлхэх хүчин зүйлийн газар зүйн судалгаа"-нд дурдсанаар 2045 он гэхэд нийслэл хотод амьдардаг хүний тоо нийт хүн амын 60 хувьд хүрэх тооцоолол гарчээ.

График №2. 2000 оноос хойш Улаанбаатар хотод шилжин ирсэн болон явсан хүний тоо

2000 оноос хойш Улаанбаатар хотод нийт 665 мянган хүн орон нутгаас шилжин ирсэн. Жилд дунджаар 27.7 мянган хүн шилжин ирдэг бол 2016-2019 онд буураад байсан шилжилт хөдөлгөөн 2020 оноос огцом нэмэгдэж, жилд ирэх хүний тоо 40 мянгад хүрчээ.

Монгол Улсад ган, зуд тохиолдсон жилүүдэд хүн амын шилжилт хөдөлгөөн эрчимждэг гэдгийг судлаач дурдаж байсан ба энэ жилийн зудын нөлөөгөөр Улаанбаатар хотод шилжин ирэгсдийн тоо нэмэгдэх хандлагатайг мөн хэлж байсан юм.

График №3. 2023 онд аймгуудад шилжин ирсэн хүний тоо

2023 онд Монгол Улсад нийт 56,152 шилжилт хөдөлгөөн бүртгэгдсэний 32,299 буюу 57.5 хувийг нийслэл Улаанбаатар хот руу чиглэсэн шилжилт хөдөлгөөн эзэлж байна. 

Улаанбаатарын дараа Дархан-Уул, Орхон, Өмнөговь, Төв аймагт хамгийн олон хүн буюу тус бүр хоёр мянгаас дээш хүн шилжин суурьшсанаараа удаалж байгаа юм.