• 9 сарын 20, Баасан
|
Уншиж байна ...

2021 оноос хойш цахилгаан дугуй, суррон зэргийн импорт болон ослын тоо тасралтгүй өсжээ

М.Батчимэг, ikon.mn
2024 оны 8 сарын 28
IKON.MN

Сурронтой холбоотой албаны эх сурвалжуудаас гаргасан зарим тоо баримт болон санал зөвлөмжүүдийг хүргэж байна. 

Монгол Улсад 2021 оноос 2024 оны 8-р сарын 15-ны өдрийн хооронд нийт 8,637 ширхэг цахилгаан дугуй, суррон импортолсон гэх мэдээлэл байгаа бөгөөд ямар үйлдвэрийн болон хүчин чадал, техникийн үзүүлэлттэй гэдэг талаар судалгаа, мэдээлэл байхгүй талаар өмнө нь ХЭҮК-оос мэдээлсэн. 

Уг өсөлтийг дагаад хоёр дугуйт тээврийн хэрэгслээс үүдэлтэй зам тээврийн осолд орсон нийт хүний тоо болон осолд өртсөн 0-18 насны хүүхэд, жолоодож явах үедээ зам тээврийн осолд орсон хүүхдийн тоо 2021 оноос хойш тасралтгүй өссөн үзүүлэлттэй байна.

Энэ жилийн долдугаар сарын 31-ний байдлаар гэхэд л өмнөх жилүүдийн тоог давсан тооны хүүхэд хоёр дугуйт тээврийн хэрэгслээс үүдэлтэй зам тээврийн осолд өртжээ. 

"Суррон, скүүтер зэргээс үүдэлтэй осол гэмтэлд өртсөн хүмүүсийн 60 хувийг 10-18 насны хүүхэд эзэлж байна" 

Гэмтэл согог судлалын үндэсний төвд энэ төрлийн тээврийн хэрэгслээс үүдэлтэй осол гэмтэлд 2020 онд 48 иргэн тусламж үйлчилгээ авсан бол 2023 онд 273 болж өссөн байна. Энэ оны байдлаар 178 иргэн тусламж үйлчилгээ аваад байгаа аж. 

Нийт эмчилгээ авсан иргэдийн 80 орчим хувь нь дээрх төрлийн төхөөрөмжөөс унаж, гэмтсэн бол автомашинтай мөргөлдсөн, явган зорчигч мөргүүлж гэмтсэн тохиолдол цөөнгүй хувийг эзэлж байна. 

Насны ангиллын хувьд 10-18 насны хүүхэд 60 хувийг эзэлж байгаа бөгөөд нийт гэмтлийн 18 хувийг тархи, 26 хувийг тохой, шуу, 18 хувийг өвдөг, шилбэний гэмтэл эзэлж байна гэжээ.

ТЦА: Сурроныг мэргэжлийг тамирчдад зориулж бүтээсэн

ХЭҮК-оос эрх бүхий төрийн байгууллагуудтай хийсэн уулзалтын үеэр Тээврийн цагдаагийн албанаас "Сурроныг мэргэжлийг тамирчдад зориулж бүтээсэн. Дээд хурд нь 120 км/цаг. Харин цахилгаан скүүтер нь 50 км/цаг хүртэл хурдлах хүчин чадалтай. Нидерланд, Ирланд, Грек, Франц, Канад, Индонез, БНХАУ зэрэг улс орнууд замын хөдөлгөөнд оролцуулахыг бүрэн хориглосон" гэжээ. 

НЗДТГ: Зориулалтын талбайг нь гаргаж өгөх тооцоо судалгааг хийж байна

Нийслэлийн Засаг Даргын орлогч Л.Хосбаяр 18 нас хүрээгүй бол суррон унахыг хориглох хуулийн өөрчлөлтийн санал хүргүүлэхээр болсон талаараа мэдээлэх үеэрээ нийслэлийн зүгээс зориулалтын талбайг нь гаргаж өгөх тооцоо судалгааг хийж байна хэмээн хэлээд байгаа юм. 

зураг
 
Гэрэл зургийг MPA агентлагийн онцгой зөвшөөрөлтэйгөөр ашиглав

Албаны байгууллагуудаас ямар санал гаргав? 

Нийслэлийн Засаг Даргын Тамгын Газар: Насанд хүрээгүй хүүхэд суррон унаж замын хөдөлгөөнд оролцохыг хориглох зохицуулалт хийхээр Хууль зүй, дотоод хэргийн сайд болон Зам тээврийн сайдад хуулийн өөрчлөлтийн санал хүргүүлсэн. 
ЦЕГ-ын Бүртгэл хяналтын төв: Дэлхийн зарим улс орны жишгээр 18-аас дээш насны иргэдийг сургалтад хамруулсны үндсэн дээр суррон унах зөвшөөрөл олгох тухай санал гаргасан. 
Тээврийн Цагдаагийн Алба: Цахилгаан скүүтер болон сурроныг зам тээврийн хөдөлгөөнд оролцуулахын тулд бүртгэлийн дугаар, гэрчилгээ олгох, түрээслэгч байгууллагуудад зөвшөөрөл олгох, замын хөдөлгөөний дүрэм зөрчсөн тохиолдолд хөдөлгөөнийг хязгаарлах, цахим бүртгэл нэвтрүүлэх, замын хөдөлгөөнд оролцох мэдлэг, дадлыг хүүхдүүдэд бага наснаас нь олгох, сургалт, нөлөөллийн ажлыг эрчимтэй өрнүүлэх, явган хүн болон унадаг дугуйн замыг тусгаарлах зэрэг арга хэмжээ авах шаардлагатай.
Гэмтэл, согог судлалын үндэсний төв: Осолд ихэвчлэн бага насны хүүхэд өртөж байгаа учир энэ төрлийн тээврийн хэрэгсэлтэй харьцах мэдлэг, мэдээллийг иргэдэд олгох, эрх зүйн зохицуулалтыг сайжруулах шаардлагатай. 
Жолоочийн мэргэжлийн зөвлөл: Жолооны мэргэшсэн багш нараар Ерөнхий боловсролын сургуулийн сургагчдад замын хөдөлгөөний дүрэм, аюулгүй байдлын талаарх сургалтыг сургалт оруулснаар бага наснаасаа замын хөдөлгөөний аюулгүй байдлыг ухамсарладаг болно.