ОХУ-аас 5.5 мянган тонн гурилыг татваргүй оруулж ирсэн ч ҮНЭ БУУСАНГҮЙ
Гурил, малын тэжээлийг гаалийн албан татвараас чөлөөлөх тухай хуулийг энэ оны дөрөвдүгээр сард УИХ баталсан.
Үүнтэй холбогдуулан тавдугаар сарын 1-нээс гурил, малын тэжээл зэрэг нийт 11 бүтээгдэхүүнийг тодорхойгүй хугацаагаар гаалийн албан татвараас чөлөөлсөн.
Үндэсний Статистикийн Хороо голлох нэрийн барааны дундаж үнийг долоо хоног бүрээр гаргадаг. Ингэхдээ "Алтан тариа" үйлдвэрийн гурилыг Улаанбаатарын зах худалдааны төвүүдэд хэдэн төгрөгөөр зарагдаж буй мэдээллийг авч судалдаг. Учир нь тус үйлдвэрийн гурилыг хамгийн их хэрэглэгчтэй гэж үзээд дундаж үнэ болгож тооцдог байна.
ҮСХ-оос гаргасан үнийн мэдээллийг хууль батлагдах, гаалийн албан татвараас чөлөөлөх Засгийн газрын тогтоол гарах сар өдрүүдтэй харьцуулж үзэв. Гурилын үнэ өнгөрсөн саруудад өсөж, буурахгүй тогтвортой байгаа ажиглагдлаа.
Гаалийн Ерөнхий Газар манай улсаас орж гарсан бараа, бүтээгдэхүүний мэдээллийг сар бүрээр нь тооцон гаргаж, албан ёсны сайт дээрээ нээлттэй тавьдаг. Манай улс 2024 оны эхний таван сарын байдлаар АНУ, Итали, ОХУ, БНХАУ зэрэг улсаас 14 мянга гаруй тонн гурил импортолжээ.
Үүнээс гурван мянган тонныг АНУ, Итали, БНХАУ-аас импортолжээ. Тэгэхээр манай улсад импортлогдож буй гурилын 99 хувь нь ОХУ-ынх байгаа юм. Зөвхөн тавдугаар сард 5.5 мянган тонн гурилыг 1.5 сая ам.доллароор ОХУ-аас худалдаж авсан байна.
ҮСХ импортоор орж ирсэн гурилын үнийг ажигладаг. Гэхдээ ОХУ-аас орж ирсэн гурил хаана ямар үнээр зарагдаж байгаа талаар дэлгэрэнгүй мэдээллийг олон нийтэд хуваалцах боломжгүй хэмээн тайлбар өгсөн юм.
Засгийн газрын зүгээс "Манай улсын жишсэн хүн амын гурил, гурилан бүтээгдэхүүний хэрэгцээг 2024 оны байдлаар тооцоход 290 мянган тонн байна.
Гурил, гурилан бүтээгдэхүүний дотоодын үйлдвэрлэл, нөөцийг харгалзан жилийн нийт хэрэгцээний 10 хүртэл хувь буюу 25 мянган тонн улаан буудайн гурилыг Монгол Улсын хилийн боомт бүхий аймгуудаар импортлох шаардлага үүсээд байна" хэмээн хуулийн танилцуулгадаа дурдаж байв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
