ФОТО: Орон нутагт явуулын эмнэлгийн үйлчилгээ үзүүлэх тусгай тоноглолтой 20 автомашиныг хүлээлгэж өглөө
Монгол Улсын Засгийн газар, Бүгд Найрамдах Польш Улсын Засгийн газар хоорондын нөхцөл зээлийн ерөнхий хэлэлцээрийг 2017 оны тавдугаар сарын 9-нд байгуулсан билээ. Энэ хэлэлцээрийн төслийг санхүүжүүлэх гэрээ байгуулах хугацааг 2019 оны долдугаар сарын 24 болгож өөрчилсөн. Ингэхдээ эрүүл мэндийн салбарт санхүүжилт авахаар болсон юм.
Тодруулбал нийт 28 жилийн хугацаанд 0.15%-ын хүүтэй 50 сая еврогийн зээл авахаар хоёр улсын Засгийн газар тохиролцсон аж.
Улмаар орон нутагт явуулын эмнэлгийн тусламж, үйлчилгээ үзүүлэх тусгай тоноглогдсон автомашин ханган нийлүүлэх төслийн хүрээнд Польшийн Засгийн газраас Германд үйлдвэрлэсэн "MAN Truck & Bus" брэндийн 20 автомашиныг өнөөдөр гардуулан өглөө.
Энэ үйл ажиллагаанд Эрүүл Мэндийн сайд Б.Чинзориг, Польшоос Монгол Улсад суугаа Элчин Сайдын Яам(ЭСЯ)-ны ажилтнууд болон бусад албаныхан оролцсон юм.
Монгол Улсын Засгийн газрын 2018 оны нэгдүгээр сарын 24-ний өдрийн 25 дугаар тогтоолоор дээрх зээлийн санхүүжилтээр дараах зургаан төслийг хэрэгжүүлэхээр тогтсон байна. Үүнд:
- Аймгуудын бохир ус цэвэрлэх байгууламжийг өргөтгөн шинэчлэх, шинээр барих төсөл – 17.5 сая евро;
- Гал түймэртэй тэмцэх техник тоног төхөөрөмжийг шинэчлэх төсөл – 3 сая евро;
- Гамшиг, ослын үед үүрэг гүйцэтгэх хээрийн хөдөлгөөнт эмнэлэг төсөл – 6.5 сая евро;
- Хүнсний ногооны үйлдвэрлэл, нэмүү өртгийн сүлжээг хөгжүүлэх төсөл – 10.2 сая евро;
- Эрдэнэт хотын хатуу хог боловсруулах үйлдвэр байгуулах, хог хаягдлыг татан зайлуулах менежментийг сайжруулах төсөл – 9 сая евро;
- Орон нутагт явуулын эмнэлгийн тусламж, үйлчилгээ үзүүлэх тусгай тоноглогдсон автомашин ханган нийлүүлэх төсөл – 3.8 сая евро.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
7 СЭТГЭГДЭЛТЭЙ
|
