Улаанбаатарт метро барих төслийн Зөвлөх үйлчилгээний тендерийг өнөөдөр зарлахаар болжээ

Бээжин хотын метро. Гэрэл зургийг MPA агентлагийн онцгой зөвшөөрөлтэйгөөр ашиглав

Эх сурвалжийн мэдээлснээр метро барих төслийн Зөвлөх үйлчилгээний олон улсын тендерийг өнөөдөр 12:00 цагт зарлахаар болжээ. Зөвлөх үйлчилгээнд 54.6 тэрбум төгрөгийг зарцуулах аж. Уг тендерт шалгарсан компани ТЭЗҮ, зураг төсөл дээр ажиллах, гүйцэтгэгчид хяналт тавих үүрэгтэй байна.

Японы олон улсын хамтын ажиллагааны байгууллага буюу ЖАЙКА-ийн хийж байсан урьдчилсан ТЭЗҮ-д тулгуурлан тендер зарлана. Энэ жилийн хувьд бүтээн байгуулалтад 333 тэрбум төгрөгийг төсөвлөжээ.

"Амгалангаас Яармагийн дэнж хүртэл метротой болох шийдвэр гарлаа, 2028 онд явуулна" хэмээн сайд Б.Дэлгэрсайхан мэдэгдэж байсан юм.

Улаанбаатар хотод их багтаамжийн нийтийн тээврийн хэрэгсэл буюу метрог барьж байгуулах, гүйцэтгэгч, менежментийн зөвлөх үйлчилгээг үзүүлэх ажлын холбогдох тооцоо судалгаа, үнэлгээг хийж, 2024 оны төсөвт тусгахаар болсон. Энэ хүрээнд метроны төслийг санхүүжүүлэх, сургууль, цэцэрлэгийн хүртээмжийг нэмэгдүүлэх, тохижилт гэсэн гурван чиглэлээр энэ оны төсөвт тодотгол хийжээ.

НИТХ-аас нийслэлийн 2024 оны төсвийг тодотгохдоо нийт орлогыг 1,122,582,443.2 төгрөг байхаар баталжээ. Үүнээс татварын орлого 873,119,158.3, татварын бус орлого 230,365,833.7 төгрөг байна.

Түүнчлэн нийслэлийн хөрөнгийн зардлын дээд хэмжээг 1,641,110,048.9 байх бол үүний 1,397,488,647.6 төгрөг нь хөрөнгө оруулалтын төсөл арга хэмжээ.

Баталсан төсөвт орж буй өөрчлөлтийн хувьд нийслэлийн 2023 оны төсвийн орлогын давалт 276,623,000, мөнгөн хөрөнгийн үлдэгдэл 21,400,000, Нийтийн Тээврийг Хөгжүүлэх Сангийн дансны үлдэгдэл 4,218,855 төгрөгийг нийслэлийн энэ оны төсвийн жилд нэмж зарцуулахаар болжээ.