ХАРЬЦУУЛАЛТ: "Aqua garden" хорооллын барилгын ажил үргэлжилсээр байна
Усан парк байгуулна гэсэн ч орон сууцны хороолол барьж эхэлсэн гэх "Aqua garden"-ы асуудал олон нийтийн дунд маргаан дагуулж, улмаар өнгөрсөн оны үерийн дараа албадан буулгахаар шийдвэрлэснээ тухай үеийн Хотын дарга Д.Сумъяабазар мэдэгдэж байв.
Түүнчлэн Авлигатай Тэмцэх Газар(АТГ)-аас эрх бүхий албан тушаалтнууд албан тушаалын байдлаа урвуулан ашиглаж, газрын, усны тухай хууль, бусад хуулийг зөрчиж, үерийн далан суваг шуудуу бүхий бүсэд газар эзэмших болон барилга барих зөвшөөрөл олгож, баригдсан барилгыг ашиглалтад хүлээн авсны улмаас бусдад давуу байдал олгосон гэх хэргүүдэд эрүүгийн хэрэг үүсгэн шалгаж байгаа юм.
2022 оны дөрөвдүгээр сар: газар ашиглах эрхийг цуцлах тухай албан бичгийг хүргүүлэв
"Эм Энд Жи констракшн" ХХК-ийн барьж буй барилгын талбайн Усны тухай хуулийг зөрчиж байгаа тул 2022 оны дөрөвдүгээр сарын 15-нд БОАЖЯ-аас тухайн үеийн хотын даргад тус компанийн газар ашиглах эрхийг цуцлах тухай албан бичгийг хүргүүлэв.
2023 оны долдугаар сар: Сэлбэ гол үерлэв
2023 оны долдугаар сарын 5-ны өдөр Сэлбэ голын үерийн далан сэтэрч ойр орчмын орон сууцны хотхонууд усанд автав. Энэ үеэр Улсын Онцгой Комисс "Aqua garden" хорооллын барилгын талбай дунд голын урсцыг сааруулж байна гэж мэдээлсэн юм.
Түүнчлэн тухайн үеийн хотын дарга уг хорооллын талаар "2008 онд анх газар олгох зөвшөөрөл авахдаа “Усан парк” барина хэмээн газрын болон барилгын зөвшөөрөл гаргуулсан ч сүүлдээ орон сууцны хороолол барьж эхэлсэн. Сүүлийн жилүүдэд шат шатны шүүх дамжиж цаг хожсоор өнөөг хүрсэн" хэмээж байв.
2023 оны наймдугаар сар: барилгыг албадан нураана гэв
"Aqua garden", "S.Outlet", Шунхлай ШТС-ын барилгыг буулгана. Нураах зардлыг эхлээд нийслэлийн төсвөөс гаргаж, дараа нь эдгээр компаниар нөхөн төлүүлнэ гэдгийг тухайн үеийн хотын дарга Д.Сумъяабазар хэлж, гурван объектыг албадан буулгах тухай захирамжийн төслөө уншиж танилцуулж байв.
2024 оны нэгдүгээр сар: Барилгын ажил үргэлжилсээр байна...
Гэсэн хэдий ч барилгын ажил одоог хүртэл зогсолгүй үргэлжилсээр буйг 2023 оны долдугаар сар болон 2024 оны нэгдүгээр сарын байдлыг харьцуулсан доорх зургаас харж болохоор байна.
2024.01.17
2023.07.25ФОТО (2024.01.17)
