ЦЕГ: Иргэдийг машинаараа дайрахаар оролдсон гэх Л.Чинбатад холбогдох гомдлыг бүртгэлд авч, үргэлжлүүлэн шалгаж байна
"Гацуурт" компанийн захирал Л.Чинбат морьтой иргэдийг машинаараа хөөж байгаа бичлэг өчигдөр нийгмийн сүлжээнд тархаж, тэрбээр өөрөө "Манай адууг туугаад явж байгаа малын хулгайч нартай тэмцэж байна" гэсэн тайлбарыг цахим хуудсаараа өгөөд буй. Харин цагдаагийн байгууллагаас "Гарал үүслийн бичиггүй адуу оруулах гээд байна, оруулахгүй гэхэд манай ажилчдыг дайрна гээд хөөгөөд байна" гэх дуудлага, мэдээллийн дагуу хойшлуулшгүй ажиллагаа явуулж байгааг мэдээлсэн.
Уг асуудлыг үргэлжлүүлэн шалгаж байгааг цагдаагийн байгууллагаас өнөөдөр мэдээлэв.
ЦЕГ-ын Хэвлэл, Мэдээллийн Төвөөс "Сэлэнгэ аймгийн цагдаагийн газарт 2023 оны зургаадугаар сарын 15-ны өдөр иргэн "У"-аас тус аймгийн Зүүнбүрэн сумын хоёрдугаар багт иргэн "Ч" гарал үүслийн бичиггүй адуу мал оруулах гээд иргэдийг автомашинаар дайрахаар оролдсон гэх дуудлага мэдээлэл бүртгэгдсэн.
Цагдаагийн байгууллагаас дуудлага, мэдээллийн дагуу холбогдох ажиллагааг хийн гомдол мэдээллийг бүртгэлд авч, шалгалтын ажиллагааг үргэлжлүүлж байна" гэлээ.
