ФОТО: Оюутолгойн нийт баялгийн 80 хувийг эзэлдэг гүний уурхай

Н.Эрхбаяр, iKon.mn

2023 оны 3 сарын 13

iKon.MN

Гэрэл зургийг MPA агентлагийн онцгой зөвшөөрөлтэйгөөр ашиглав

Оюутолгойн гүний уурхайн олборлолт албан ёсоор өнөөдөр эхлэв.

Монгол Улсын эдийн засагт ихээхэн эерэг үр дүн авчрах хүлээлт үүсгээд буй энэхүү үйл явдлын нээлт газрын гадаргаас 1.3 километрийн гүнд боллоо. Арга хэмжээнд Ерөнхий сайд Л.Оюун-Эрдэнэ, "Рио Тинто" группийн Гүйцэтгэх захирал Якоб Сатусхолм болон албаны бусад хүн оролцов.

2022 онд "Оюу Толгой" компани 1.4 тэрбум ам.долларын борлуулалт, 200 сая ам.долларын хөрөнгө оруулалт хийсэн нь цар тахлаас үүдэлтэй эдийн засгийн хүндрэлийг даван туулахад чухал үүрэг гүйцэтгэжээ.

Нээлтийн үеэр Ерөнхий сайд Л.Оюун-Эрдэнэ хэлсэн үгэндээ "Оюу Толгойн төсөл бол Монгол Улс ардчилсан тогтолцоонд шилжсэнээс хойш хийж буй гадаадын хамгийн том хөрөнгө оруулалт төдийгүй, Монгол Улс гуравдагч хөрш оронтой анх удаа бие даан хэрэгжүүлж буй эдийн засгийн тусгаар тогтнол, бие даасан байдлыг ханган хэрэгжүүлэх чухал үүрэг гүйцэтгэх түүхэн төсөл" хэмээн онцолсон юм.

Монгол Улсын Засгийн газар, Рио Тинто компани 2022 оны нэгдүгээр сард хамтын ажиллагаагаа шинэ түвшинд гаргаж, Оюу толгойн гүний уурхайн төслийг урагшлуулах хэлэлцээрт хүрснээр 21 хүдэр буулгуурыг тэсэлж олборлолтоо эхлүүллээ. Энэ эрчээрээ 2030 он гэхэд Оюу Толгой дэлхийн дөрөв дэх том зэс үйлдвэрлэгч болоод зогсохгүй олборлолтын зардал хамгийн бага уурхайнуудын тоонд багтах юм. Одоогоор хүдрийг Хойд Хюго ордын ашиглалтын нэгдүгээр давхрын "Панел 0" талбайгаас олборлож байгаа бөгөөд ирэх жилүүдэд үйлдвэрлэлийн хэмжээг шат дараатай нэмэгдүүлэх аж.

Уурхайн 20,000 орчим ажиллах хүчний 97 хувийг Монголчууд бүрдүүлж байна. Оюу Толгой нь үндэсний 500 гаруй ханган нийлүүлэгчидтэй хамтран ажилладгаас гадна 2010 оноос хойш дотоодод нийт 15 тэрбум ам.доллар зарцуулснаас татвар, хураамж болон бусад төлбөрөөр дамжуулан 4 тэрбум ам.долларыг улсын төсөвт төлсөн байна.

Ордын хамгийн агуулга сайтай хүдрийг олборлох үүдийг нээн бүх оролцогч талуудад өгөөжөө хүртээх гүний уурхай нь 7 тэрбум гаруй ам.долларын хөрөнгө оруулалттай бүтээн байгуулалт юм. Оюу Толгойн ил болон гүний уурхайгаас 2028-2036 оны хооронд жилд дунджаар 500,000 тонн зэс олборлоно гэж тооцсон нь 6 сая цахилгаан автомашин үйлдвэрлэхэд хүрэлцэх хэмжээ бөгөөд дараагийн 30 орчим жилд дунджаар 290,000 тонн зэс үйлдвэрлэх юм.

Нээлтийн үеэр Монгол Улсын Ерөнхий сайд Л.Оюун-Эрдэнэ “Бид Рио Тинтогийн түншүүдтэйгээ Монгол Улсыг дэлхийн тэргүүлэх зэс үйлдвэрлэгчдийн нэг болоход чухал түүхэн мөчийг тэмдэглэж байгаадаа сэтгэл дүүрэн байна. Оюу толгойн гүний уурхайн олборлолт ийнхүү эхэлж байгаа нь бид хөрөнгө оруулагчидтай тууштай хамтран ажиллаж чаддаг итгэлтэй түнш гэдгийн тод жишээ юм. Монгол Улс цаашдаа ч олон улсын хөрөнгө оруулагч, түншүүдтэйгээ идэвхтэй, харилцан ашигтайгаар хамтран ажиллахад бэлэн байна" гэв.

Рио Тинто Группийн Гүйцэтгэх захирал Якоб Стаусхолм “Энэхүү чухал зорилтод хүрэхэд түншийн хувиар хичээн зүтгэсэн Монгол Улсын Засгийн газарт талархал илэрхийлье. Говь нутагт газрын гадаргаас доош 1.3 километрийн гүнд байгаа хүдрийн биеэс олборлолт эхлүүлж буй нь олон улсын зэсийн үйлдвэрлэл болон Монгол Улсын эдийн засгийн хөгжилд нэн чухал ач холбогдолтой. Энэхүү дэлхийд тэргүүлэх дэвшилтэт технологи бүхий уурхай нь нүүрстөрөгчийн хийн ялгарлалт шингээлтийг тэнцвэржүүлэхэд нэн чухал эрчим хүчний шилжилтэд үнэтэй хувь нэмэр оруулж, Рио Тинтогийн зэсийн бизнест өсөлт авчрах юм” гэдгийг онцлов.

ФОТО: Оюутолгойн нийт баялгийн 80 хувийг эзэлдэг гүний уурхай

Оюу толгойн гүний уурхайн гэрэл зургийг хүргэе