Гэрэл зургийг MPA агентлагийн онцгой зөвшөөрөлтэйгөөр ашиглав

35 хүний бүрэлдэхүүнтэй эрэн хайх, аврах баг “Буянт-Ухаа” олон улсын нисэх буудлаас өглөөний 04:34 цагт Турк улсыг зорилоо.

БНТУ-ыг зорьж байгаа Монгол Улсын аврагчдын багт мөрч хоёр нохой багтжээ. ОБЕГ-ын харьяа Үндэсний аврах бригадын 4 настай Марта, 3 настай Балу дуудлагатай ноход нь эрэн хайхад бүрэн сургагдсан байна.

Эрэн хайх, аврах багийнхантай УОК-ын дарга болон Монгол Улсад суугаа Туркийн Элчин сайд Зафер Атеш нар уулзсан юм.

УОК-ын дарга С.Амарсайхан учирч болзошгүй эрсдэлийг сайтар тооцож, өөрийн болон бусдын аюулгүй байдлыг хангаж ажиллахыг захисан бол Элчин сайд Зафер Атеш “Нэг ч гэсэн турк хүний амь нас, эрүүл мэндийг аврахын төлөө гамшгийн бүс рүү явж байгаа та бүхэнд баярлалаа. Нэг ч хүний амь аврахгүй байсан ч гэсэн хүнд бэрх цагт монголчууд та бүхний гаргасан энэхүү халуун сэтгэлийг Туркийн ард түмэн хэзээд талархан хүндэтгэж, ач санаж явах болно” гэв.

Аврах багийнхан 1,500 ноосон хөнжил, 10 тонн махан нөөш, 2 тонн лаа бусад хүмүүнлэгийн тусламжийг хүргэхээр авч явжээ.

Фото