СУРВАЛЖИЛГА: Ааруулаар таваг засахад багадаа 300 мянга, ууцны үнэ 250-450 мянган төгрөг байна
XVII жарны "Үзэсгэлэн болгогч" хэмээх харагчин туулай жилийн хаврын тэргүүн сарын шинийн нэгэн нь хоёрдугаарын сарын 21-нд тохионо.
Сар шинийн баяр болоход 20 гаруй хоногийн хугацаа үлдсэн энэ үед мах, ууц, өвчүү, гурил, цагаан идээ болон хэвийн боов ямар үнэтэй байгааг сурвалжлахаар Хүчит шонхор захыг зорилоо.
Хэвийн боов нэг ширхгийг 3,000-5,000 төгрөгөөр борлуулж байна
Монголчууд бидний уламжлалт баярын гол идээ болох хэвийн боовны үнэ нэг ширхэг нь 3,000-5,000 төгрөгөөр худалдаалагдаж байна. Ширхэг тутмын үнийг тодруулбал,
- Гандангийн хэвийн боов 3,800 төгрөг
- Өгөөмж-Ар хад 4,200 төгрөг
- Тариан түрүү 3,000 төгрөг
- Өег 4,200 төгрөг
- Очирваань идээ 3,500 төгрөг
- Товгор хэв үйлдвэрийн хэвийн боов 5,000 төгрөгийн үнэтэй байв.
Худалдагч "Сүүлийн үед залуус ихэвчлэн гүрмэл худалдаж авдаг болсон. Амт, чанараас шалтгаалж гүрмэл ширхэг нь 3,800-4,800 төгрөгийн үнэтэй байгаа. Дараа нь идэхэд амттай гэж хүмүүс хэлдэг. Гэхдээ уламжлалаа бодвол хэвийн боов нь зүгээр" хэмээн ярилаа.
Ууцны үнэ 250,000-450,000 төгрөг
Буузны гол орц хонины мах жижиглэнгээр 7,600 төгрөгийн үнэтэй байгаа бол ямааны мах бөөний үнэ 6,000, адууны мах 10,000, үхрийн мах 11,500-14,500 төгрөгийн үнэтэй байна.
Үхрийн махны үнэ ханш:
- Үхрийн цул гуя 14,500 төгрөг
- Үхрийн сээр 12,500 төгрөг
- Үхрийн хавирга 10,000 төгрөг
- Үхрийн гуя ястай 11,500 төгрөг
Түүнчлэн бага адууны ястай махыг 10,000 төгрөгөөр борлуулж байна. Өглөө эрт 11,000 төгрөгөөр зарж байсан, үдээс хойш дуусаад ирэхээрээ үнийг нь буулгадаг гэдгийг махны худалдаачин хэлсэн юм.
Цааш явж захын гадаа зарж буй ууц, өвчүүний үнийг асуусан юм. Махны худалдагч Г "Ууц килограмм нь 8,500 төгрөгийн үнэтэй. Харин өвчүүний килограммын үнэ 12,000 төгрөгт хүрч байгаа.
Бүтэн ууцыг 250,000-450,000 төгрөгийн хооронд борлуулж байна. Өдөрт 3-4 ууц, өвчүү л зардаг. Сар шинийн баяр удахгүй боллоо. Энэ жил худалдан авалт гойд муу, "Үнэтэй байна" гэсэн хүмүүс их болсон. Иргэдийн худалдан авах чадвар муудаад байна" гэв.
Ааруулаар тавгийн идээ засвал хамгийн доод тал нь 300,000 төгрөг болно
Ойролцоох худалдааны төв рүү орж, хорхой ааруул, өрөм, бяслаг, шар тос, хайлмаг зэрэг олон төрлийн сүү, сүүн бүтээгдэхүүний үнийг сонирхсон юм. Цагаан идээг ууталж бэлтгээд дээр нь үнийг нь бичиж, наасан байв.
Килограмм тутмын үнийг танилцуулж байна.
- Хорхой ааруул 18,000 төгрөг
- Сарлагийн өрөм 22,000 төгрөг
- Сингапур шар тос 10,000 төгрөг
- Монгол шар тос 28,000-30,000 төгрөг
- Өрөм 22,000 төгрөг
- Шүүсэн аарц 6,000 төгрөг
- Хайлмаг 8,000-10,000 төгрөг
- Цөцгий 15,000 төгрөг
- Ээзгийтэй тос 12,000 төгрөг
- Сарлагийн өрөм 25,000 төгрөг
- Орос масло 10,000
- Зулын шар тос 7,000 төгрөг
- Ямааны ааруул 30,000 төгрөг
- Бяслаг 17,000 төгрөг
- Дөрвөлжин чихэртэй ааруул 25,000 төгрөг
Цагаан идээ борлуулж буй худалдагч “Цагаан сарын баяраар ааруулаар тавгийн идээ засвал хамгийн доод тал нь 300,000 төгрөг болно. Үзэсгэлэн худалдаа гарснаас хойш цагаан идээний үнийг хөөрөгдсөн.
Манай захад хорхой ааруул 18,000 төгрөг байхад үзэсгэлэн худалдаанд доод тал нь 25,000 төгрөг болгож зардаг. Яг үнэндээ үзэсгэлэн худалдаа гэдэг чинь бүх юмны үнийн хөөрөгдлийг бий болгож байгаа юм" хэмээв.
Иргэд ихэвчлэн "Улаанбаатар", "Алтан тариа", "Хурх"-ын дээд гурилыг худалдаж авдаг
Гурил, будааны бөөний худалдааны төвөөс иргэд ихэвчлэн "Улаанбаатар", "Алтан тариа", "Хурх"-ын дээд гурилыг авдаг гэдгийг худалдагч хэлж байв.
"Улаанбаатар" нэгдүгээр гурил 25 килограмм нь 52,000 төгрөгийн үнэтэй байгаа бол 10 килограммыг 22,000 төгрөгөөр борлуулж байна.
"Алтан тариа" гурил 25 килограмм нь 58,000 төгрөгийн үнэтэй бол 10 килограмм нь 23,000 төгрөг болж байна.
"Хурх"-ын дээд гурил 10 килограмм нь 32,000 төгрөгийн үнэтэй бол 5 килограмм нь 16,000 төгрөгөөр худалдаалагдаж байна.
ФОТО:
