Уншиж байна ...

ОХУ цэргийн дайчилгаа зарласнаас хойш сар орчмын хугацаанд 22,540 орос иргэн Монголд орж ирснээс 85% нь гарч явжээ

Г.Өлзийхутаг, iKon.mn
2022 оны 10 сарын 21
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

ОХУ цэргийн дайчилгаа зарласан өдрөөс хойш нэг сар орчмын хугацаанд хилийн боомтуудаар тус улсын нийт 22,540 иргэн манай улсад орж иржээ.

Тодруулбал, ОХУ-ын ерөнхийлөгч Владимир Путин есдүгээр сарын 21-нд цэргийн дайчилгаа зарласны дараа Монгол руу нэвтрэх гэсэн орос иргэд хилийн боомт дээр урт дараалал үүсгэсэн төдийгүй хилээр орж ирсэн ОХУ-ын иргэдийн тоо хоногийн дотор гурав дахин нэмэгдэж байсан юм.

Цэргийн дайчилгаа зарласан өдөр буюу есдүгээр сарын 21-ний 08:00 цагаас аравдугаар сарын 19-ний 08:00 цаг хүртэлх хугацаанд манай улсад ОХУ-ын 22,540 иргэн орж ирсэн бол 19,075 иргэн гарсан талаар Хил хамгаалах ерөнхий газрын эх сурвалж мэдээллээ. Үүнд бусад улсаас Монголд ирсэн болон дайчилгаа зарлахаас өмнө Монголд байж байгаад буцаж гарсан эсвэл өөр улс руу ниссэн Оросын бүх иргэний тоо багтаж байгаа юм. 

Тухайлбал, зөвхөн Алтанбулаг боомтоор Оросын 10,990 иргэн орж ирснээс 60 хувь нь тухайн боомтоор эргэн гарчээ. Харин Боршоо боомтоор 5,914 иргэн орж ирсэн бол 6,039 иргэн эргэн гарсан байна.

Мөн дээрх графикаас харахад, сар орчмын хугацаанд "Чингис хаан" олон улсын нисэх буудлаар буюу агаарын замаар ОХУ-ын 1,297 иргэн аль нэг улсаас Монголд ирсэн бол 3,473 иргэн Монголоос нисжээ. Гэхдээ тухайн иргэдийн хаашаа ниссэн талаарх мэдээлэл тодорхойгүй байна.

Түүнээс гадна нийт хилээр орж ирсэн ОХУ-ын иргэдийн 55.4 хувь нь эрэгтэй бол 44.5 хувь нь эмэгтэй байна. Харин хилээр гарч явсан иргэдийн 49.5 хувь нь эрэгтэй бол үлдсэн 50.4 хувь нь эмэгтэйчүүд байжээ.

Мөн манай улсад орж ирсэн ОХУ-ын цэргийн насны буюу 18-35 насны нийт 8,316 иргэний 2,070 нь Алтанбулаг боомтоор эргэн гарсан бол 1,382 нь буюу 16.6 хувь нь агаарын замаар дамжин Монголоос нисжээ. Өөрөөр хэлбэл, манай улсад орж ирсэн 18-35 насны орос иргэд Монголоос гарч явахдаа ихэвчлэн Алтанбулаг боомтоор эсвэл агаарын замаар дамжжээ.

Сүүлийн өдрүүдэд манай улсыг зорин ирэх ОХУ-ын иргэдийн байдлын талаар албаны эх сурвалжуудаас тодруулахад "Есдүгээр сарын 22-ноос хойш долоо хоногийн хугацаанд хилийн боомтуудад хөдөлгөөн огцом эрчимжээд эргээд буурсан. Тодруулбал, тухайн үед манай улсад өдөрт орж ирэх ОХУ-ын иргэдийн тоо 600-1,000-ыг давж байсан бол одоо өдөрт Оросын 150-180 орчим иргэн хилээр орж ирж, гарч байгаа" гэсэн тайлбарыг өглөө.

Мөн "Монгол Улс болон ОХУ-ын иргэд 30 хоногийн хугацаанд харилцан визгүй зорчдог тул хилийн боомтуудаар орж ирж буй ОХУ-ын иргэд албан ёсны бичиг баримттайгаа, хуулийн дагуу хил нэвтэрч байгаа. Тиймээс тэднийг дайнаас дүрвэсэн гэж нэрлэх боломжгүй" гэдгийг онцоллоо.

Ташрамд дурдахад, ОХУ-ын батлан хамгаалах яам дээрх цэргийн дайчилгаагаар 300,000 бэлтгэл хүчийг Украины фронтод дайчлах зорилготой байсан бөгөөд яг долоо хоногийн өмнө, Баасан гарагт тус улсын ерөнхийлөгч Владимир Путин хоёр долоо хоногийн дараа дайчилгааг зогсоох төлөвлөгөөтэй байгаагаа хэлсэн.

Түүнээс хойш дөрөв хоногийн дараа Москва хот цэргийн дайчилгааг зогсоосныг зарласан билээ.