Баруун бүсэд ногоон эрчим хүч үйлдвэрлэх 10 МВт-ын Алтай нарны цахилгаан станц барих ажлыг "М-Си-Эс Интернэйшнл" эхлүүллээ

Эрчим хүчний оргил ачааллынхаа үед дизель станц ажиллуулдаг ганц аймаг бол Говь-Алтай. 

Тэгвэл өөрсдийн эрчим хүчний эх үүсвэртэй болох алтайчуудын мөрөөдөл энэ сарын 21-нд биелэв.

Тодруулбал, Монгол Улсын Засгийн газар, Эрчим хүчний яамнаас хэрэгжүүлж буй, Төвийн эрчим хүчний системээс алслагдсан аймгуудад Сэргээгдэх эрчим хүчний эх үүсвэрийг нэмэгдүүлэх төслийн хүрээнд Азийн Хөгжлийн Банк (АХБ)-ны хөнгөлөлттэй зээлийн санхүүжилтээр Говь-Алтай аймгийн Алтай хотын Есөнбулаг сумын нутагт хэрэгжүүлэх 10 МВт (МегаВатт)-ын хүчин чадалтай нарны цахилгаан станцын шав тавих ёслол энэ өдөр тохиож, барилгын ажил эхэллээ.

 

"Алтай 10 МВт-ын нарны цахилгаан станц"-ын төслийн ерөнхий гүйцэтгэгчээр "М-Си-Эс Интернэйшнл" ХХК шалгарсан ба барилга угсралт, туршилт тохируулгыг нэг жилийн хугацаанд гүйцэтгэж, 2023 оны зургаадугаар сард дуусган байнгын ашиглалтад хүлээлгэн өгөх юм байна.

Тус компанийн хувьд Дорноговь, Төв, Завхан аймагт нарны цахилгаан станцын төсөл амжилттай хэрэгжүүлж байсан туршлагатай тул энэ удаагийн төсөл амжилттай хэрэгжинэ гэдэгт итгэлтэй байгаагаа шав тавих ёслолд оролцогчдын зүгээс онцолсон юм.

 

Алтайчуудын хүсэн мөрөөдөж байсан ажлын эхлэл тавигдаж, Говь-Алтай аймгийн эрчим хүчний эх үүсвэр 10 МВт-аар буюу ногоон эрчим хүчээр нэмэгдэж байгаад баяртай байгаагаа тус аймгийн ИТХ-ын дарга Д.Даваадорж нээлтийн үеэр хэлсэн юм.

"М-Си-Эс Интернэйшнл компани Алтай 10 МВт-ын нарны цахилгаан станцын төслийн ажлыг нэг жилийн хугацаанд хийж гүйцэтгэхээр ажлаа эхлүүлж байна"

 

"М-Си-Эс Интернэйшнл" ХХК-ийн Алтай 10 МВт-ын нарны цахилгаан станцын төслийн удирдагч Ө.Цогтбаяр “Манай компани 2017 онд Дорноговь аймгийн Замын-Үүд суманд 15 МВт-ын “Замын-Үүд Гэгээн нарны цахилгаан станцыг, 2018-2019 онд Хөшигийн хөндийд байрлах 15 МВт-ын “Бөхөг” нарны цахилгаан станцыг барьсан. 2021-2022 онд Завхан аймгийн Алдархаан суманд 5 МВт-ын нарны цахилгаан станц, батарей хуримтлуурын төслийг гүйцэтгэж байгаа бөгөөд төслийн гүйцэтгэл 95 хувьтай явна.

Харин одоо Алтай хотын 10 МВт-ын нарны цахилгаан станцын төслийг эхлүүлэх ерөнхий гүйцэтгэгчээр сонгогдон ажлаа эхлүүлж байна. Станц ашиглалтад орсноор алслагдсан бүс болох Алтай Улиастайн эрчим хүчний системийн найдвартай ажиллагаа сайжирч, өөрийн гэсэн шинэ эх үүсвэртэй болох юм. Бид нэг жилийн хугацаатайгаар энэхүү төслийн барилгын ажлыг хийж гүйцэтгэхэд нутгийн ард иргэд нутгийн ард иргэд бүх талаараа туслан дэмжиж ажиллана гэдэгт итгэж байна” гэв.

"Дотоодоос эрчим хүчний хэрэглээгээ хангах, импортын хараат байдлаас гарах, эрчим хүч экспортлогч улс болох томоохон төсөл хөтөлбөрүүд бодит ажил болж эхэллээ"

 

Эрчим хүчний сайд Н.Тавинбэх “Шинэ сэргэлтийн бодлогод тусгагдсан дотоодоос эрчим хүчний хэрэглээгээ хангах, импортын хараат байдлаас гарах, урт хугацаандаа эрчим хүч экспортлогч улс болох томоохон төсөл хөтөлбөрүүд бодит ажил хэрэг болж эхэлж байна. Зөвхөн өнөөдөр гэхэд эрчим хүчний дөрвөн төслийн барилга угсралтын ажлыг эхэлж буйн нэг нь Баруун бүсийн цахилгаан хангамжид ногоон эрчим хүч үйлдвэрлэж, нийлүүлэх 10 МВт-ын хүчин чадалтай Алтай нарны цахилгаан станц юм. Эрчим хүчний хэрэглээний чанар, хүртээмжийг сайжруулах томоохон төслүүд эхэлж байна” гэв.

"Нарны станц баригдах энэ ажлыг манай аймгийн иргэд олон жил хүлээсэн"

 

Говь-Алтай аймгийн Есөнбулаг сумын Засаг дарга А.Алтанхуяг “Энэ сайхан өдөр Алтай хотод маань 10 МВт-ын хүчин чадалтай Алтай нарны цахилгаан станцын төслийн нээлтийн үйл ажиллагаа болж байгаад сэтгэл өндөр байна. Монгол Улсад оргил ачааллынхаа үед дизель станц ажиллуулдаг ганц аймаг нь манайх. Тэр утгаараа энэхүү нарны станц ашиглалтад орсноор Говь-Алтай аймгийн хөгжилд өндөр хувь нэмэр оруулна гэдэгт итгэлтэй байгаа. Энэ ажлыг манай аймгийн иргэд олон жил хүлээсэн. Говь-Алтай аймаг 59 мянга орчим хүн амтай. Алтай хотын хувьд 2022 онд 19,004 хүн тоологдсон. Эрчим хүчний яам болон төслийг хэрэгжүүлэх гол үүргийг хүлээсэн "М-Си-Эс Интернэйшнл" компанийн туршлагатай хамт олонд нийт иргэдийнхээ зүгээс талархсанаа илэрхийлж байна” хэмээв.

 

Эрчим хүчний яамны Сэргээгдэх эрчим хүчний хэлтсийн дарга Ё.Энхтуяа “Баруун бүсэд сэргээгдэх эрчим хүчийг нэмэгдүүлэх төслийн хүрээнд нийт 40.5 МВт-ын нийлбэр хүчин чадалтай нар, салхи, цэнэгт хураагуур, газрын гүний дулааны сэргээгдэх эрчим хүчээр дулаан хангамжийг шийдэх төслүүд хийгдэж байгаа. Үүний нэг хэсэг нь Есөнбулаг суманд хэрэгжиж буй уг төсөл юм. Уур амьсгалын өөрчлөлтийг сааруулахад Монгол Улс хүлээсэн үүргийн хүрээнд баруун бүс нутгаа ногоон эрчим хүчний эх үүсвэрээр хөгжүүлэх бодлогыг эрчим хүчний салбар барьж ажиллаж байна" гэлээ.

Баруун бүсийн эрчим хүчний систем өнөөдөр нийт хэрэглэдэг эрчим хүчнийхээ 70 орчим хувийг ОХУ-аас импортоор авч байна. Иймд тус бүс нутагт баригдахаар төлөвлөгдсөн томоохон станцууд ашиглалтад орсноор Баруун бүсийн эрчим хүчний хэрэглээг дотоодоос ногоон эрчим хүчээр хангах бүрэн боломжтой болох юм.