Гэрэл зургийг Mpa.mn

Нисэх буудлын хоёрдугаар давхрын зорчин явагчдын танхимын гол том дэлгэц дээр нислэгийн мэдээлэл харагдана. Доош харвал зорчин ирэгчдийн танхим буюу нэгдүгээр давхар харагдах бөгөөд дэлгэцийг тойруулан шилэн хаалт хийжээ. Шилэн хаалтыг бүдүүн нарийн, өнгө өнгийн олсоор бүрсэн байв. Япон хэв маяг шингээсэн чимэглэл бололтой хэмээн бодож явтал нисэх буудлыг танилцуулж буй хөтөч "Энд таван төрлийн олс байгаа. Энэ нь хоёрдугаар давхарт явж байгаа даашинз, юбкатай зорчигчийн хөл, гуяыг нэгдүгээр давхарт байгаа хүмүүст харуулахгүй байх зорилготой" хэмээн тайлбарлав. 

Эндээс дараагийн хэсэг буюу үйлчилгээний талбайг чиглэн явлаа. Хамгийн эхэнд нүдэнд тусах, хаалганы дэргэдэх талбайд хөгжлийн бэрхшээлтэй иргэдийн гар урлалын бүтээгдэхүүнийг зарах дэлгүүрийг нээжээ. 

Хаалганаас танхимын гол хэсэг хүртэл хөгжлийн бэрхшээлтэй иргэдэд зориулсан тусгай тэмдэглэгээ бүхий зам хөтлөн явсаар мэдээллийн цэгт хүргэнэ. Энд мэдээллийн ажилтан, тэргэнцэр, хүүхдийн тэрэг, түргэн тусламжийн багаж хэрэгсэл, санал хүсэлт хүлээн авах хэсэг бий. 

Түүнчлэн өлзий хээтэй ханын хавтан, хог ангилах хаях зориулалт бүхий нэвт харагдах хогийн сав гээд энгийн мэт зүйлс нь утга учир, тайлбартай, нарийн нямбай төлөвлөсөн нь хаалгаар орсон даруйд ийн мэдрэгдэнэ. Цааш уужим саруулхан танхимын зохион байгуулалт, нарны гэрэл шууд тусах хүлээлгийн хэсэг, бүх төрлийн үйлчилгээ зэрэг нь олон улсын шинэ нисэх буудлын стандартыг хангасан гэдгийг хөтөч танилцууллаа.

Монгол Улсад анх удаа нисэх буудлын менежментийг хувийн хэвшил хариуцна

 

Гэрэл зургийг Mpa.mn

Японы олон улсын хамтын ажиллагааны байгууллага/ЖАЙКА/-ын 65 тэрбум иений хөнгөлөлттэй зээлийн төслөөр баригдсан 33,000 м/кв талбай бүхий нисэх буудлын бүтээн байгуулалтын ажил 2013 онд эхэлж, 2020 оны долдугаар сард дууссан хэдий ч коронавируст халдварын нөхцөл байдлаас шалтгаалан энэ оны долдугаар сарын 4-нд албан ёсоор нээлтээ хийгээд буй. 

Дээрх хөнгөлөлттэй зээлийн төслөөс гадна ЖАЙКА байгууллагаас техникийн хамтын ажиллагааны төслөөр дамжуулан нисэх буудлын үйл ажиллагааны төлөвлөгөө боловсруулах,  нислэгийн зурвас болон шатахуун хангамжийн ашиглалт засвар үйлчилгээ, үнэ тариф тогтоох болон түрээсийн менежмент, зорчигчийн тав тух, сэтгэл ханамжийг нэмэгдүүлэх чиглэлд дэмжлэг үзүүлжээ. Энэ хүрээнд нислэгийн салбарын 150 орчим албан хаагч Япон улсад дадлагажиж, сургалтад хамрагдсан байна. 

Шинэ нисэх буудал хүчин чадлын хувьд Буянт-Ухаа дахь хуучин буудлаас 2.5 дахин их бөгөөд жилд 3 сая жуулчин хүлээн авах хүчин чадалтай. "Шаардлагатай үед үйл ажиллагааны зохицуулалтаас хамаараад хүчин чадлаа нэмэгдүүлж дээд тал нь 4.5 сая жуулчин хүлээн авах боломж бий. Аялал жуулчлалын нөөц бололцоог сайжруулах тал дээр Монгол Улсын Засгийн газартай хамтарч ажиллана" гэдгийг "Нью Улаанбаатар интернейшнл эйрпорт" ХХК-ийн Санхүү хариуцсан захирал бөгөөд удирдлагын газрын дарга Норико Кишикава хэлж байв. 

Үндсэндээ Япон менежментээр үйл ажиллагаа явуулах Чингис хаан олон улсын нисэх буудал нийт 620 ажилтантай бөгөөд Японоос томилогдон ирсэн зургаан ажилтан байгаа аж. 

Шинэ нисэх буудлын бүх байгууламж хуучнаас 1.5-2.5 дахин том 

Гэрэл зургийг Mpa.mn

Нисэх буудлын бүтээн байгуулалтын ажил өнгөрсөн оны долдугаар сард дууссан бөгөөд Япон улсын хамгийн орчин үеийн дэвшилтэт технологиудыг нэвтрүүлсэн гэдгийг хөтөч хэлж байв. 

Зорчигчийн терминалаас гадна удирдлагын цамхаг, дулааны станц, гал команд, ангар, захиргаа удирдлагын байр гэх мэт нийт 10 гаруй барилга байгууламжтай бөгөөд үндсэн бүх байгууламжууд хуучнаасаа 1.5-2.5 дахин том хэмжээтэй.

Эдгээр барилга байгууламжид суурилсан тоног төхөөрөмж нь хамгийн сүүлийн үеийнх. Тухайлбал, онгоцны нисэх буудалтай холбогдох хоолой/gate/-н доод хэсэг хүртэл 1,900 метр хоолойгоор шатахуун татах системтэй бөгөөд нэг минутад 3,780 литр түлшийг онгоцонд шахаж, сумлах хүчин чадалтай. Буянт-Ухаа нисэх буудалд автомашинаар буюу нэг минутад 900 литр түлш шахдаг байсан бөгөөд ийнхүү онгоцыг сумлах хурдан дөрөв дахин нэмэгдсэн.

Түүнчлэн 3,600 метр урт нислэгийн зурвастай. Салхины чигээс хамааран  баруун, зүүн аль ч талаасаа онгоц буух боломжтой" гэдгийг Шуурхай удирдлага хяналтын төвийн аэродромын үйл ажиллагаа зохицуулалтын мэргэжилтэн Э.Дөлгөөн хэллээ.

Зорчигч үйлчилгээний терминалын хувьд орон нутгийн зорчигчдод зориулсан хэсэгтээ 10, олон улсын зорчигчдод зориулсан хэсэгтээ бүртгэл хийх 16 цонхтой, хэсэг тус бүрд ачаа тээш баглах цэг, паспортоор бүртгэл хийх КИОСК-г байршуулжээ. 

Түүнчлэн олон улсын стандартыг хангасан татваргүй барааны дэлгүүрүүд үйл ажиллагаагаа явуулаад эхэлсэн байв. Буянт-Ухаа нисэх буудалд байгаагүй тээш хадгалах, валют арилжаа, авто машин түрээсийн үйлчилгээг шинэ нисэх буудалд үзүүлж байна. Түүнчлэн зорчигчид цагаа ая тухтай өнгөрүүлэх лоунж, ресторанууд ч үйл ажиллагаагаа эхлүүлжээ. 

Фото

Гэрэл зургийг Д.Занданбат /MPA.mn/

Шинэ нисэх буудлыг танилцуулах арга хэмжээний төгсгөлд Японы ЭСЯ-ны гуравдугаар нарийн бичгийн дарга Катанода Томоки "Чингис хаан олон улсын нисэх буудал бүс нутгийн ачаа тээврийн үйлчилгээг нэвтрүүлж, Монгол Улсын хөгжил дэвшилд хувь нэмрээ оруулна гэдэгт итгэлтэй байна.

Ирэх жил Япон Монгол хоёр орны хооронд дипломат харилцаа тогтоосны 50 жилийн ой тохионо. Хоёр орны харилцааг дараагийн 50 жилд авч явах залуу үедээ  зориулан бид тус ойн арга хэмжээг өргөн хүрээнд тэмдэглэнэ. Манай улсын стратегийн чухал түнш Монгол Улстай хамтын ажиллагаагаа улам бүр хөгжүүлнэ гэдэгт итгэлтэй байна" гэдгийг хэллээ.