Улаанбаатар хотоос ДОЛООН аймагт COVID-19-ийн халдвар ЗӨӨВӨРЛӨГДЛӨӨ

Коронавирусийн халдварын тархалт эрчимжиж, Монгол Улсад бүртгэгдсэн тохиолдол 4,340 болоод буй. Ялангуяа, аймгуудад халдвар хурдацтай тархаж байна.

Зөвхөн өнөөдөр л гэхэд Хөвсгөл, Хэнтий аймагт анх удаа COVID-19-ийн батлагдсан тохиолдол бүртгэгдэв. 

Тодруулбал, Хөвсгөл аймагт 7 тохиолдол, Хэнтий аймагт нэг тохиолдол шинээр батлагдаж, 2021 он гарснаас хойш Улаанбаатар хотоос орон нутагт зөөвөрлөгдсөн тохиолдол 20  болж, ДОЛООН аймагт бүртгэгдлээ.

Өмнөговь аймагт үйл ажиллагаа явуулж буй "Оюу толгой" компанийн нэг ажилтнаас халдвар илэрснийг Эрүүл мэндийн сайд С.Энхболд мэдээлсэн. Гэвч ЭМЯ Өмнөговь аймгийг халдвар бүртгэгдсэн гэж албан ёсоор мэдээлээгүй байна. Он гарсны дараа Ховд аймаг руу зорчсон иргэдээс илэрсэн халдварыг мөн тус аймагт бүртгээгүй байгаа юм.

Нийслэлээс аймгуудад тархсан халдварыг газрын зураг дээр үзүүлж байна. 

График. Улаанбаатараас халдвар зөөвөрлөгдсөн аймгууд(Аймаг бүрийн нэр дээр дарж, зөөвөрлөгдсөн халдвар бүртгэгдсэн мэдээллийг харах боломжтой)

Эдгээр долоон аймгийн тавд нь гуравдугаар сарын 1-нээс Улаанбаатар хотоос гарах хөдөлгөөнийг нээсний дараа халдвар зөөвөрлөгдсөн байна.

Үүнээс өмнө Архангай аймагт л гэхэд анх 2020 оны арваннэгдүгээр сарын 29-нд хоёр, арванхоёрдугаар сарын 1-нд нэг тохиолдол бүртгэгдсэнээс хойш халдвар огт бүртгэгдэлгүй гурван сар болоод байв.  

Харин Төв, Хөвсгөл, Завхан, Хэнтий аймагт ийнхүү халдвар анх удаа зөөвөрлөгдөн бүртгэгдлээ.

Улаанбаатар хотоос халдварын тархалт газар авч байгаа нь PCR шинжилгээний хариугаа хүлээгээгүй явсан, өөр хүний хариуг ашигласан гэх мэт зөрчилтэй холбоотой байгааг Шадар сайд С.Амарсайхан мэдээлж, цаашид ийнхүү зөрчил гаргасан иргэдийг нэрээр нь зарлана гэдгээ сануулаад байгаа юм.