Нью Йорк хотын төв цэцэрлэгт Covid-19 өвчтөнүүдийг эмчлэх зорилгоор асрууд босгож эхэлжээ

АНУ-ын коронавирусийн тархалтын төв болоод байгаа Нью Йорк хотын төв цэцэрлэгт хүрээлэнд өчигдөр асрууд босгож, түр эмнэлэг байгуулж эхэлжээ.

“Өвчтэй хүмүүст туслахын тулд бид бүх боломжтой газрыг ашиглаж байна. Эндээс та бүхэн хямрал хэр гүнзгийрч байгааг харж болно” гэж хотын захирагч Билл Де Бласио мэдэгдсэн байна.

Түр эмнэлэг Мягмар гарагт нээгдэх бөгөөд 68 ортой байх гэнэ.

Үүнээс гадна тус хотын Манхеттэн дүүргийн Jacob Javits Convention Centre төвийг 1,000 ортой эмнэлэг болгон хувиргах ажил эхлээд байна.

Нью Йорк хотод Covid-19 халдвараар Бямба гарагт 517 хүн нас барсан бол Ням гарагт 678 болж нэмэгджээ. Энэ нь 24 цагийн дотор есөн минут тутамд нэг хүн нас барсан гэсэн үг юм.

Ижил хугацаанд шинээр илэрсэн халдварын тохиолдол 10.8 хувиар өсөж, 29,158-аас 32,308 болж нэмэгджээ.

Ням гарагийн үдээс хойш гэхэд дахин 98 хүн нас барж, эндэгдлийн нийт тоо 776 хүрсэн байна. Европ тивийн тахлын нэг төв болоод байгаа Испани улсад анхны эндэгдлээс 1,000 дахь эндэгдэл бүртгэгдэх хүртэл 18 өдөр болсныг Жон Хопкинсийн их сургууль тооцоолжээ. Италид энэ үзүүлэлт 21 өдөр байсан юм.

Харин Нью Йорк хотыг оролцуулаад Нью Йорк мужийн хувьд 16 өдөр байна. Эндээс Нью Йоркод нөхцөл байдал ямар байгааг ойлгож болно.

Нийт Нью Йорк муж даяар шинээр илэрсэн халдварын тохиолдол Ням гарагийн байдлаар 59,513 хүрсэн нь АНУ-д хамгийн муу үзүүлэлт юм.

Холбооны засаг захиргаанаас АНУ-ын тэнгисийн флотын USNS Comfort эмнэлгийн хөлгийг илгээсэн нь Даваа гарагт Нью Йоркийн боомтод ирэхээр болжээ.

Эмч нарын бүтэн баг, 1,000 ор, 12 мэс заслын өрөөтэй тус хөлөгт коронавирусийн бус өвчтөнүүдийг шилжүүлж, үндсэн эмнэлгүүдийн орыг чөлөөлөх зорилготой байна.

Эх сурвалж: AFP