COVID-19 Монгол Улсад хэрхэн нөлөөлж байна вэ?

Манай улсын урд хөршид шалтгаан нь тодорхойгүй уушгины хатгалгаа өвчин гарсныг шинэ төрлийн коронавирусээр үүсгэгдсэн болохыг ДЭМБ албан ёсоор зарлаад дөрөв дэх сартайгаа золгох гэж байна. 

Өнөөдрийн байдлаар шинэ коронавирус буюу COVID-19-ийн халдвар дэлхийн 212 улс орон, газар нутгийг хамарч, нийт 3.58 сая хүн халдвар авснаас 1.16 сая нь эдгэрч, 248,440 хүн амиа алдаад байгаа билээ. 

Монгол Улс халдварт өвчнөөс урьдчилан сэргийлэх хүрээнд нэгдүгээр сарын 27-ноос тодорхой шийдвэрүүд гарган өндөржүүлсэн бэлэн байдалд шилжин хөл хорио тогтоосон нь өнөөдөр ч хүчин төгөлдөр хэвээр үйлчилж байна. 

Өнгөрсөн хугацаанд Монгол Улс эх орондоо ирэх хүсэлт гаргасан дэлхийн улс орон дахь монголчуудаа татан авах ажлыг зохион байгуулсаар байгаа бөгөөд нийт 11 удаагийн тусгай үүргийн нислэг гүйцэтгээд байна. 

Өнөөдрийн байдлаар манай улсад бүртгэгдсэн тохиолдол 40 болсон нь 100% гаднаас зөөвөрлөгдөж орж ирсэн бөгөөд 12 хүн эдгэж, 28 хүн эмчлүүлж байгаа билээ. 

Энэхүү халдварт өвчинтэй холбоотой гаргасан шийдвэрүүд, хөл хорио болон гаднах зах зээлийн нөлөө Монгол Улсын эдийн засагт ч нөлөөлсөн бөгөөд Засгийн газраас 5.1 их наяд төгрөгийн хөтөлбөрийг хэрэгжүүлж байна. 

Монгол Улс дахь COVID-19-ийн нөлөөллийн түүх(Инфографик дээрх утгууд дээр дарснаар дэлгэрэнгүй мэдээллийг харах боломжтой):