4 сарын 20, Бямба

Уншиж байна ...

ХУУЧИРСАН МЭДЭЭ: 2016/01/12-НД НИЙТЛЭГДСЭН

Ухаалаг УЛААНБААТАР болоход НЭГ ТОМ АЛХАМ урагшиллаа

Б.БЯМБАСҮРЭН, iKon.mn

2016 оны 1 сарын 12

iKon.MN

~Өдрийн сурвалжлага~

“Ухаалаг Улаанбаатар” хөтөлбөрийн хүрээнд нээгдэж буй Нийслэлийн үйлчилгээний нэгдсэн төвөөр бид зочиллоо.

Нийслэлээс иргэдэд үзүүлж буй төрийн үйлчилгээнүүдийг нэг дор төвлөрүүлж, зарим үйлчилгээний шийдвэрлэх хугацааг богиносгон, иргэдэд учруулж буй хүндрэл,чирэгдлийг багасгах зорилготойгоор Нийслэлийн үйлчилгээний нэгдсэн төвийг байгуулжээ.

Баянзүрх дүүрэгт орших Дүнжингарав худалдааны төвд байрлаж буй энэ төв 2,200 мкв газрыг хамарсан сэлүүхэн, том талбайтай юм.

Төрийн үйлчилгээ үзүүлдэг нэгдсэн төв ийм саруулхан, цэвэрхэн, эмх цэгцтэй байж болдог юм байна гэсэн бодол төрөхийн зэрэгцээ “супермаркет” гээд нэрлэчихмээр санагдав.

Гэхдээ энэ “супермаркет”-аас та бараа биш төрийн үйлчилгээ авна. Мөн энд өлгүүр, хүүхэд саатуулах өрөө, мэдээлэл хүлээн авах ухаалаг дэлгэц, нотариат зэрэг бий.

УХААЛАГ ХОТ ГЭЖ ЯМАР ХОТЫГ ХЭЛЭХ ВЭ?

Бид энд ирээд “Ухаалаг Улаанбаатар” хөтөлбөрийн зөвлөх Г.Зоригтой уулзав. Тэрбээр бидэнд уг хөтөлбөрийн суурь агуулгыг танилцууллаа.

Г.Зориг "Ухаалаг хотын хамгийн том ялгаа нь хот өөрөө дэд бүтэц, үйлчилгээ, цахилгаан, дулаан, ус, барилга байгууламжийнхаа ямар ч мэдээллийг түргэн авч, удирдаж байгаад оршино. Хотын амьдралд маш олон зүйлс ийм болох учиртай. Товчоор бол ухаалаг технологиор мэдээллээ авч, удирдана гэсэн үг.

“Ухаалаг Улаанбаатар” хөтөлбөрийг бид анх гурван үе шаттай хэрэгжүүлэхээр төлөвлөсөн.

1.   E Улаанбаатар
2.   Digital Улаанбаатар
3.   Ухаалаг Улаанбаатар юм.

2013-2016 он хүртэл E буюу электрон Улаанбаатар болж байна. Цаашид ийм төрлийн нэгдсэн төвүүд нээгдэх бөгөөд дараагийнх нь Мишээл Экспод байхаар төлөвлөгдсөн" гэв.

Гэрэл зургийг MPA.mn

УХААЛАГ ХОТЫН ЭХЛЭЛ БОЛСОН ЭНЭХҮҮ ТӨВД ИРГЭД ИРСНЭЭР 200 ГАРУЙ ҮЙЛЧИЛГЭЭ АВНА

Энд 205 орчим үйлчилгээ үзүүлэхээр төлөвлөгдөж байгаа аж. Албан ёсны нээлт нь ирэх Пүрэв гарагт буюу нэгдүгээр сарын 14-нд болох ч энд өдөртөө 400-500 иргэн үйлчлүүлсээр байна.

Дүнжингарав худалдааны төв дэх нийслэлийн “Нийслэлийн үйлчилгээний нэгдсэн төв” нь нэг удаадаа 180, өдөрт 2,880-6,480 үйлчлүүлэгч хүлээн авч үйлчлэх хүчин чадалтай аж.

Цагийн хуваарь: Ажлын өдрүүдэд 08:00-20:00, Бямба гарагт 10:00-16:00 цаг.

Ингээд Нийслэлийн үйлчилгээний нэгдсэн төвтэй илүү сайн танилцацгаая.

ӨӨРТӨӨ ҮЙЛЧЛЭХ ӨРӨӨ

Ажил хөөцөлдөнө гэдэг амаргүй. Тэгвэл энэ төвд ирснээр иргэд өөртөө үйлчлэх өрөөнд орж даралтаа үзэх, массажны сандал дээр ядаргаагаа тайлах, ус уух, ухаалаг дэлгэцнээс мэдээлэл авах боломжтой.

НИЙСЛЭЛИЙН УДИРДЛАГУУДТАЙ "УУЛЗАХ" БОЛОМЖ

Энэ цахим угтах өрөөнд иргэд суугаад Нийслэлийн удирдлагуудтай цахимаар уулзах боломжтой. Ингэхдээ тогтсон хуваарь, цагийн дагуу уулзах хүнтэйгээ цахимаар ярилцаж, санал бодлоо илэрхийлэх юм.

Хамгийн гол нь удирдлагуудтай уулзах гэж заавал НЗДТГ орж хүлээх, цаг авах шаардлагагүй болж байгаа аж.

ХҮҮХДЭЭ ТҮР СААТУУЛНА

Бага насны хүүхэдтэй ээжүүд ажлаа амжуулах боломжтой болжээ. Энэхүү хүүхэд харах, тоглоомын өрөөнд хүүхдээ түр үлдээгээд үйлчлүүлж болно.

ЦЭЭЖ ЗУРГАА ӨӨРӨӨ АВНА

Мэдээллийн технологийн дэвшлийг харуулсан өөр нэгэн хэсэг бол энэ зураг авах өрөө юм. Танд яаралтай зураг хэрэг болбол эндээс хаашаа ч гарахгүй, хялбар аргаар цээж зургаа дарж болох нь.