21 ээж Алдарт эхийн одон гардав

Монгол Улсын Ерөнхийлөгч Ц.Элбэгдорж Олон улсын хүүхдийн эрхийг хамгаалах өдрийг тохиолдуулан зарлиг гаргаж, олон хүүхэд төрүүлж, өсгөн хүмүүжүүлсэн ээжүүдийн төлөөлөл болох 21 эхэд "Алдарт эх" нэг, хоёрдугаар одон гардуулав.

"Алдарт эх" нэгдүгээр одонгоор Хан-Уул дүүргийн X хорооны иргэн Борхүүгийн Нина, Хан-Уул дүүргийн II хорооны иргэн Махбалын Байгаль, Баянзүрх дүүргийн XVIII хорооны иргэн Затияны Бахатгуль, Баянгол дүүргийн IX  хорооны иргэн Борисын Ундраа  нарыг, 

"Алдарт эх" хоёрдугаар одонгоор  Баянзүрх дүүргийн XVIII хорооны иргэн Дөрвөнжингийн Саруулбаясах, Баянзүрх дүүргийн II хорооны иргэн Бавуудоржийн Ариунтунгалаг, Баянгол дүүргийн  IV хорооны иргэн Даваажавын  Сандуйжав, Баянзүрх дүүргийн 26 дугаар хорооны иргэн Төмөрбаатарын Оюунханд, Баянгол дүүргийн  V хорооны иргэн Хуваагийн Батцэцэг, Баянгол дүүргийн  VII хорооны иргэн Нямсүрэнгийн Оюун-Эрдэнэ, Сүхбаатар дүүргийн  VI хорооны иргэн Даваасамбуугийн Эрдэнэтуяа, Чингэлтэй дүүргийн  VI хорооны иргэн Зандангийн Мягмарзаяа, Чингэлтэй дүүргийн  17 дугаар хорооны иргэн Жадамбын Булгансайхан, Налайх дүүргийн VII хорооны иргэн Энхтайваны Мөнхзаяа, Сүхбаатар дүүргийн  VI хорооны иргэн Мөнхцогтын Дэлгэрсайхан, Сонгинохайрхан дүүргийн VI хорооны иргэн Ганхуягийн Гүррагчаа, Чингэлтэй дүүргийн  1 дүгээр хорооны иргэн Долгорсүрэнгийн Цэнджав, Сүхбаатар дүүргийн  VI хорооны иргэн Амангельдийн Туул, Сонгинохайрхан дүүргийн  32 дугаар хорооны иргэн Нямцэрэнгийн Эрдэнэбилэг, Баянгол дүүргийн  V хорооны иргэн Жавзандуламын Солонго, Сүхбаатар дүүргийн  I хорооны иргэн Эрдэнэбатын Хишигсайхан нарыг шагналаа.

Монгол Улсын Ерөнхийлөгч Цахиагийн Элбэгдорж “Алдарт эх” одон гардуулж хэлсэн үгэндээ“Эрхэм хүндэт ээжүүд ээ, Эхийн алдар одонгоо гардан авсан хүндэт ээжүүд Та бүхэнд болон Олон улсын хүүхдийн эрхийг хамгаалах өдрийг инээд хөөрөөр дүүрэн тэмдэглэж буй ээжүүд, хүүхэд багачууддаа баярын мэнд хүргэж, сайны ерөөл өргөн мэндчилье. Монголчууд улам олуулаа болох бэлгэ ерөөл биелэн оршиж, бид 2015 онд өсөн нэмэгдэх ховор заяанд төрсөн гурван сая дахь иргэнээ угтан авлаа. Энэ бол манай түүхэнд тохиосон тэмдэглэлт үйл явдал болсон билээ. Эх орон, эрх чөлөөний эзэд болж төрсөн хөвүүд, охид маань эрдэм ухаан төгс, зориг золбоо төгөлдөр сайн хүн болж, Монголын нэрийг даянд дуурсгана гэдэгт итгэж байна.   

Монголын бахархалт түүх, уламжлал, хөгжил дэвшил бүхэн монгол эхчүүд, эмэгтэйчүүдийн оюун билиг, эрдэм ухаан, хичээл зүтгэл, оролцоо санаачилгатай салшгүй холбоотой юм. Монгол бүсгүйчүүд эх орныхоо хөгжил дэвшлийг урагшлуулах, өрх гэрээ сайн сайхан байлгахад бүхий л сэтгэл зүрхээ зориулж амжилт ололтыг түүчээлсээр байна.

Эхийн хайранд эх дэлхий амгалан оршдог. Монгол эхчүүдийн хайр энэрэл, ивээл өршөөл, сургааль билиг бол монгол хүн бүрийн ямагт санаж явах учиртай судар юм. Бид ээжүүд, хүүхдүүдийнхээ эрхийг хамгаалахын төлөө улам их хичээж ажиллах болно. Монгол хүүхэд бүр инээж, аз жаргалтай өсөн өндийх ёстой.
Шагнал гардаж авсан ээжүүддээ дахин чин сэтгэлийн баярын мэнд хүргэж Та бүхний гэр бүл, үр хүүхдэд хамгийн сайн, сайхан бүхнийг хүсэн ерөөе. Монголын үрс маш олон болох болтугай” гэв.

1

2

3

4

5