"BYD", "Huawei", "Mindray" зэрэг Хятадын технологийн томчуудтай танилцсан нь

Уур амьсгалын өөрчлөлтийг сааруулахын тулд эх дэлхийдээ ээлтэй буюу "ногоон" байх нь бидний амьдралын шинэ хэв маяг болов.

Иймээс ч хувцас хэрэглэл, орон сууц, автомашин гээд бүгдийг "эко" байлгахыг илүүд үзэж буй. Гэртээ дулаан сайхан амьдрахын тулд заавал түлш шатаахгүйгээр шийдэх технологиуд хэдийнээ нутагшив. Мөн цахилгаан машин төрөл бүрээрээ зах зээлд нэвтэрснээр түгжрэлд хэдэн цаг зогслоо ч агаар орчныг бохирдуулах хорт бодисууд цацахгүй байх боломжтой болж байна. Дэлхий нийт энэ чигт явж, цахилгаан машины зах зээл ч тэлсээр.

Энэ зах зээлийн гол тоглогчид нь "Tесла", "BYD" болов. 2024 оны гуравдугаар улиралд "BYD"-гийн борлуулалтын орлого 28.2 тэрбум ам.долларт хүрсэн бол Теслагийнх 25.2 тэрбум ам.доллар байсныг BBC мэдээлжээ. Өөрөөр хэлбэл анх удаа "BYD" өөрийн гол өрсөлдөгч "Тесла"-г орлогоороо давсан юм. 

Цахилгаан машины зах зээлд хүчтэй өрсөлдөж буй "BYD"-д зочлох боломж бидэнд тохиолдсон юм. Учрыг тодруулбал БНХАУ-ын технологийн хөгжил дэвшил, ядуурлыг бууруулах хөтөлбөрийн хэрэгжилттэй танилцах аяллыг Монгол, Хятадын уур амьсгалын өөрчлөлт, эрчим хүчний технологи инновацын төв болон Хятадын гадаадтай найрсгаар харилцах нийгэмлэг, Хятадын Коммунист Намын Гадаад харилцааны газар, Монгол Улсад суугаа Хятад улсын Элчин сайдын яам хамтран зохион байгуулсан билээ.

Бидний очсон эхний газар бол БНХАУ-ын Гуандон мужийн Шэньжэн хот. Тус хотын нисэх буудлын дэлгэц дээрх "Once you come you are a Shenzhener" гэх бичиг хамгийн түрүүнд нүдэнд туссан. Учир нь "Хятадын Цахиурын хөндий" гэж нэрлэгддэг уг хотод оршин сууж буй иргэдийнх нь 60-70 хувь нь Хятадын өөр бусад хотоос шилжин ирцгээжээ. Иймд та нэг л удаа Шэньжэнд ирсэн бол Шэньжэнийн хүн болсон гэсэн үг хэмээн найрсгаар хүлээн авдаг аж.

Хонконгтой хиллэн орших энэ хотод "BYD", "Tencent", "Mindray" гэхчлэн технологийн дэвшлээр дэлхийд танигдсан үйлдвэр бий. 

Шэньжэн хот арваннэгдүгээр сарын дунд үед үүлэрхэг, зөөлөн шиврэх бороотой, дулаахан байлаа.

"Минутад нэг машин үйлдвэрлэх боломжтой BYD"

Энэ хотод ирээд бидний танилцсан эхний газар бол "BYD". Тус компани нь

• цахилгаан төхөөрөмж,
• автомашин үйлдвэрлэл,
• шинэ эрчим хүч,
• төмөр замын тээвэр зэрэг чиглэлээр үйл ажиллагаагаа явуулж байна.

Анх батарей үйлдвэрлэлийн чиглэлээр байгуулагдсан "BYD" 2005 онд анхны машинаа "F3" нэртэйгээр үйлдвэрлэж, үүнээс гурван жилийн дараа хосолсон цахилгаан хөдөлгүүрт машин, 2009 оноос 100 хувь цахилгаанаар автомашиныг зах зээлд нийлүүлж, жилээс жилд цар хүрээгээ тэлсээр байна. 

30 жилийн түүхтэй тус компани 2023 оны дэлхийн шилдэг 500 компанийн 143 дугаарт эрэмбэлэгдсэнээ бахархан танилцуулж байв. Мөн тэдний өнөөгийн түвшинд хүрсэн амжилтын гол үндэс нь судалгаа, хөгжүүлэлтээ ихээхэн анхаардагт оршиж буйг хөтөч онцолсон. Тэд өнгөрсөн онд л гэхэд оюуны өмчийн 3,207 гэрчилгээг шинээр авснаар нийт 26,201 оюуны өмчийн гэрчилгээг эзэмших болжээ. 

Мөн үйлдвэрийн шат дамжлагууд бараг бүхэлдээ автоматжсанаар минутад нэг машин үйлдвэрлэх боломжтой болжээ.

"BYD"-гийн хамгийн сүүлд танилцуулсан шинэ загвар нь үзүүлэнгийн танхимд хамгийн олон хүний анхаарлыг татсаар буй U8.

Хосолсон хөдөлгүүрт уг машин үер ус, гол мөрөн гатлах шаардлагатай үед 30 минут хүртэл хугацаанд усанд явах боломжтой, суурин дээрээ 360 градус эргэдэг, 3.6 секундэд 100 км/цаг хүртэл хурд авах чадалтай аж. 

Харин 100 хувь цахилгаан машинуудын тухайд батарейг нь 3,000 удаа цэнэглэх боломжтой, нэг цэнэглэлтээр дунджаар 500 км зам туулдаг. Автомашины батарейг 10 гаруй жил батарейг ашиглах боломжтой юм байна. Мэдээж хэрэг энэхүү хугацааг уртасгах, аюулгүй байдлыг нь бүрэн хангахын тулд мэргэжлийнхэн ажилласаар байгааг хэлж байлаа. 

Судалгаа, туршилт хөгжүүлэлтийн багийнхны хөдөлмөрийн үр дүнд Blade Battery-г гарган авснаа хөтөч онцлон танилцуулсан. Гол онцлог нь өөр бусад батарейг гаднын биет цоолоход дэлбэрдэг бол шинэ төрлийн уг батарей нь ямар нэг аюулгүйг дараах туршилтаар харуулсан юм.

190 гаруй улсад эмнэлгийн тоног төхөөрөмжөө хүргэсэн "Mindray"

Үүний дараа бид эрүүл мэндийн салбарт хэдийнээ танигдсан "Mindray"-д зочлов. Тус компанийн үйлдвэрлэсэн тоног төхөөрөмжүүд дэлхийн 190 улсад хүрчээ. Үүний нэг нь Монгол. Улсын Нэг, Хоёр, Гуравдугаар төв эмнэлэгт "Mindray" компанийн үйлдвэрлэсэн тоног төхөөрөмжүүд ашиглагдаж буйг тус компанийн ажилтнууд бидэнд танилцуулсан. 

Үзүүлэнгийн хэсэгт ухаалаг лаборатори, хэт авиан оношилгоо, рентген аппарат, уушги орлуулагч ЭКМО аппарат гэхчлэн "Mindray"-ын үйлдвэрлэдэг бүх төрлийн тоног төхөөрөмжүүд байв. "Mindray" Хятад улсдаа 30 гаруй, дэлхийн даяар 60 гаруй салбартай бөгөөд 2023 онд 34.9 тэрбум юань буюу бараг таван тэрбум ам.долларын орлого олжээ.

Компанийн хамт олон КОВИД-19 цар тахлын үед ажиллах хүн хүчний дутагдал, илүү их тоног төхөөрөмж үйлдвэрлэх шаардлага гэхчлэн ихээхэн хүндрэлтэй нүүр тулсан талаараа ярьж байв. Гэхдээ энэ бүгдийг амжилттай туулснаар борлуулалтын орлого эрс өссөн байна. 

Сонирхуулахад компанийн тайланд дурдсанаар 2019 оны эцэст борлуулалтын орлого нь 13.8 тэрбум юань байсан бол 2023 оны эцэст 34.9 тэрбум болж, 2.5 дахин өсжээ.

Энэ мэтчилэн технологийн компаниудын бүтээмж, орлого өссөөр буй нь судалгаа, технологийн хөгжүүлэлтдээ ихээхэн хөрөнгө зарцуулдаг, ажилтнуудынхаа цалин, урамшуулал нийгмийн хангамжид ихээхэн анхаардаг зэрэгтэй холбоотойг онцолцгоож байсан юм.

Хятад улс өмнө нь бараа бүтээгдэхүүн үйлдвэрлэгч улс байсан бол өдгөө технологийн хөгжлөөрөө дэлхийд манлайлах том амбицтай байгааг харж болохоор байв. Тэр дундаа Гуандон мужийн хувьд шинэ технологийг тууштай дэмжих стратегийг баримталж байгаа нь ажиглагдсан.

80 тэрбум ам.доллартой тэнцэхүйц хэмжээний гадаадын хөрөнгө оруулалтыг татсан Донгуан хот

Тус мужийн өөр нэг хот болох Донгуанд "Huawei" болон "ОРРО" гээд гар утас, дагалдах хэрэгслийн зах зээлд хэдийнээ өөрсдийн байр суурийг эзэлсэн газрууд бий.

10 сая гаруй хүн амтай Донгуан хотын оршин суугчдын дундаж нас 33-34. Залуусын хот гэж болохуйц энэ газарт Хятадын тоглоом үйлдвэрлэлийн 85 хувь нь явагддаг, спорт ихэд хөгжжээ. 

Хятадын нээлттэй эдийн засгийн хамгийн идэвхтэй бүс бөгөөд шинэ төрлийн материал, хувцас хэрэглэл, хүнс гэхчлэн 100 тэрбум юанийн үнэлгээний бүхий гурван том кластер, их наяд юаниар үнэлэгдэх цахим технологийн кластер зэргийг хөгжүүлж байна.

Мөн гадаад харилцааг өргөн хүрээнд хөгжүүлсний илрэл нь дэлхийн 200 гаруй улс, бүс нутагтай эдийн засаг, худалдааны хэлэлцээр хийж, 80 тэрбум ам.доллартой тэнцэхүйц хэмжээний гадаадын хөрөнгө оруулалтыг татсан явдал юм.

Ийнхүү гадаадын хөрөнгө оруулалтыг хэрхэн амжилттай татаж, хотоо хөгжүүлсэн талаар нь Донгуан хотын дэд дарга Шин Вэнжүгээс тодруулахад "Донгуан хот анх тарчиг тосгон байлаа. Өмнөх үеийнхний маань ухаалаг шийдвэр өнөөдрийн түвшинд хүргэсэн. Тэд анх хятад хэлээр ярьдаг газрууд буюу Хонконг, Тайваниас хөрөнгө оруулалтыг амжилттай татсан байдаг. Ингэхэд манай газар зүйн байршил таатайгаар нөлөөлсөн ба хууль эрх зүйн орчноо оновчтой бүрдүүлж, дэд бүтцийн асуудлаа шийдсэн нь хөгжилд эергээр нөлөөлсөн. Үүний зэрэгцээ Дэлхийн Худалдааны Байгууллагад нэгдсэн нь худалдааг чөлөөтэй явуулахад асар том түлхэц болсон" хэмээж байлаа.

Түүнчлэн тэрбээр Улаанбаатар хоттой харилцан ашигтай хамтын ажиллагааг хөгжүүлэхэд бэлэн буйгаа илэрхийлсэн билээ. Бид хотын дэд дарга болон удирдах түвшний албан тушаалтнуудтай уулзсаныхаа дараа "Huawei Dongguan campus"-ыг зорив.

Энд биднийг төсөөлснөөс тэс өөр орчин угтав, яг л Европын аль нэг хотод очсон мэт санагдсан. 

Энэхүү номын санг байгуулахдаа франц мэргэжилтнийг урьж ажиллуулжээ. Энд буй сандал ширээ, гэрэл, цонх гээд бүгдийг нь Францаас авчирсан байна. Дээврийн хэсэгт эртний болон орчин цагийн хүн төрөлхтний соёл иргэншлийн түүхэнд үнэтэй хувь нэмэр оруулсан 16 хот, газрын нэрийг байрлуулжээ. 

Перс, англи, франц, грек гээд нийт 20 гаруй хэл дээр бичигдсэн 110 мянга орчим номтой. Энд буй хамгийн эртний ном нь 15 дугаар зуунд хамаарах аж. "Huawei" компанийн ажилтнууд энд чөлөөтэй үйлчлүүлэх агаад гэр бүлийнхэн нь амралтын өдрөөр номын санд тухлан суун, оюуны үнэт бүтээлүүдийг судлах боломжтой байдаг аж. Гэхдээ номыг гадагш гаргадаггүйг номын санч бүсгүй тодотгосон.

"Huawei Dongguan Campus" нь дөрвөн бүсэд хуваагдах 12 барилгаас бүтдэг бөгөөд барилгуудын талбайн хэмжээ нь 1.4 сая ам метр. Энд судалгаа, хөгжүүлэлтийн 25,000 ажилтан ажилладаг. 7.8 километр үргэлжлэх төмөр замын шугамаар хоёр галт тэрэг ажилтнууддаа үйлчилдэг.

Уг цогцолборыг ажилтнуудаа стрессээс ангид байлгахын тулд байгуулсан аж. Өндөр барилга, хотын дуу чимээ нь ажилтнуудад стресс үүсгэх магадлал их тул байгалийн унаган төрхийг нь алдагдуулахгүйгээр ногоон байгууламж зонхилсон 500 га талбайд европ загварыг сонгон, эко орчныг бүрдүүлсэн нь энэ юм.

Биднийг очиход бороотой байсан тул цогцолбороор алхах боломж харамсалтай нь гараагүй учир галт тэргээр нь аялсан юм. Цогцолбор даяар 16 зогсоолтой, тэр бүрд түргэн цэнэглэгч байх тул цахилгаанаар ажилладаг уг галт тэрэг өөрийгөө 8-30 секундэд цэнэглээд, аяллаа үргэлжлүүлдэг байна. 

Ийнхүү хоёр өдрийн турш манай баг Хятадын технологийн томчуудтай танилцсан юм. Үүний дараагаар БНХАУ-ын ядуурлыг бууруулах хөтөлбөрийг амжилттай хэрэгжүүлсэн жишиг тосгонд зочилсон. Энэ тухай дараагийн удаад дэлгэрүүлэн хүргэх болно.