Ваадага, ваадага

Ваадага, ваадага. Шинэ парламентын 126 маань төсвийг аядуу, зөөлнөөр батлаад авлаа. Төсвийн зардал 36 их наяд ₮, орлого 34 их наяд ₮. Монголын эдийн засгийн 37 хувьтай тэнцэх зардал гэхээр айдас төрнө. Бид нүүрс зарж ногоон(ам.доллар) олдог. Олсон ногооныг иргэд, аж ахуйн нэгж, Засгийн газар нь хуваагаад хэрэглэдэг. Ирэх жил Засгийн газрын хэрэглэх ногоон ахиу байх нь дээ. Угаас төсвийн мөнгө цалин, халамж, тендер гэх мэтээр дамжин импортыг дэмждэг.

Тэгэхээр ирэх жил бидэнд илүү их ногоон хэрэгтэй. За ногооныг нүүрснээс олно гээд дараах зорилт тавьжээ. Нүүрсний үнэ 120 ам.доллар, нүүрсний хэмжээ нь 83 сая тонн. Яах вэ чичирсээр байгаад тоо хэмжээндээ хүрчих л байх. Хүрдэггүй юмаа гэхэд 60 гаргах биз. Гэвч үнэ өнөөдөр 80 ам.доллар байхад хэрхэн 120 ам.доллароор зарахыг л ойлгохгүй байгаа юм. Хөх толбот нүүрс гэх юм болов уу. Нүүрсний уна уначихаар Хятадын талын ченжүүд манайхаас авдаггүй. Угаас цааш дамлаж, хольж зардаг хүмүүст ашиг үгүй. Тэгэхээр муу амлаж байгаа ч юм биш орлого тасрах эрсдэл бий.

Тэгвэл яах юм?

Ваадага, ваадага. Орлого хүрэхгүй байхаар Татварын ерөнхий газарт үүрэг өгнө. Ноолоход амар номхон тэмээ болох иргэд, ААН-үүдээ шахаж эхэлнэ. Байцаагчаа гэсэн юм уу? юу гэсэн юм? гээд ороод ирнэ. Та бид улам хичээж, сайн ажиллахгүй бол горьгүй. Бараг шинэ жил энэ тэр хийхгүйгээр ирэх жилийн ажлаа эхэлж байх уу. Аан бас 2024 оны НӨАТ-ын өрөө төлөөрэй та минь. Монгол улсын хамгийн баян, хамгийн эрх мэдэлтэй компанийнхаа(Засгийн газар) төлөө зүтгэцгээе.

Үр дагавар нь юу юм?

Ваадага, ваадага. Монголын хамгийн баян компани нь(ЗГ) ногоон хэрэглээд эхлэхээр мань мэт хавчигдана. Амласан нүүрсний зорилгодоо хүрэхгүй бол 3 сарын настай ногооны нөөцийг нь хуу хамаад алга болно. Монголбанк яаж ч чадахгүй. Эцэст нь валютын ханш 3,600, инфляц хоёр оронтой тоонд эргэн орно. 24 онд ажилчдынхаа цалинг өсгөлөө гэж пи ар хийх гэж байгаа бол байзаарай. Тэрийг чинь үгүй хийх хоёр иртэй хутга(валютын ханш, инфляц) цалинг нь цавчих гээд ирлэгдэж эхэлсэн. Үр дагавар нь үргүй хөдөлмөр, хий эргэлт, хичээгээд нэмэргүй систем, хий хоосон насаа элээх бас нэг жил болно доо.

Монголын хамгийн баян компани нийтлэлээр тун удахгүй уулзацгаая.