Шинэ орон сууцны захиалгын гэрээний алданги тооцохгүй гэж үзсэн шүүхийн шийдвэр

Гэрэл зургийг MPA агентлагийн онцгой зөвшөөрөлтэйгөөр ашиглав

Чингэлтэй дүүргийн иргэний хэргийн анхан шатны шүүхэд нэхэмжлэгч М.С хариуцагч "ЮТ" ХХК холбогдуулж шинэ орон сууцны захиалгын үлдэгдэл төлбөр,алданги, хохирол гаргуулах тухай нэхэмжлэл

Нэхэмжлэгч шүүхэд гаргасан тайлбартаа: -Миний бие “ЮТ” ХХК-тай 2021 оны тавдугаар сарын 13-ны өдөр орон сууц захиалах гэрээ байгуулж Хан-Уул дүүрэг 21-р хороо Буянт-Ухаа спорт цогцолборын баруун хойд талд бүтээн байгуулах “Ю-Апартмент” орон сууцны хотхонд 3 өрөө орон сууцыг авто зогсоолын хамт 107,648,000 төгрөгөөр бэлнээр захиалсан. Гэвч тус “ЮТ” ХХК-ийн уг барилга нь 1 давхраас дээш баригдаагүй ба одоог хүртэл ашиглалтад ороогүй гэрээний үүргээ биелүүлээгүй тул гэрээг цуцлах санал гаргаж захиалга өгсөн төлбөрийнхөө 60,000,000 төгрөг буцаан авсан бөгөөд үлдэгдэл төлбөр 47,648,000 төгрөг үлдсэн. Энэ байрны 100% төлөлт хийхийн тулд нөхөр Г.А болон миний бие цалингийн зээл хүү, захиалсан орон сууц ашиглалтад ороогүйгээс БГД -т бусдын орон сууц хөлсөлж байгаа төлбөр

М.С миний цалингийн зээлийн хүү: 984,392 төгрөг
Нөхөр Г.А цалингийн зээлийн хүү: 1,478,942 төгрөг
Орон сууц хөлсөлсөн 6 сарын төлбөр: 4,800,000 төгрөг
Гэрээний үлдэгдэл төлбөр: 47,648,000 төгрөг
Гэрээнд заасан алданги 5,813,056 төгрөг. Нийт 60,727,390 төгрөгийг гаргуулж өгнө үү гэжээ.

Хариуцагчийн итгэмжлэгдсэн төлөөлөгч шүүхэд гаргасан хариу тайлбартаа: Нэхэмжлэгч М.С нь “ЮТ” ХХК-тай Орон сууц захиалан бариулах гэрээ 2021 оны тавдугаар сарын 13-ны өдөр байгуулсан. 2021 оны аравдугаар сарын 6-ны өдөр гэрээ цуцлах хүсэлт өгч гэрээг цуцалсан. Орон сууц захиалан бариулах гэрээний 5.9-д заасан гэнэтийн болон давагдашгүй хүчин зүйл үүсэж, барилгын ажил зогсонги байдалд орсон ч нэхэмжлэгчийн хүсэлтийг хүндэтгэн үзэж 2021 оны арваннэгдүгээр сарын 3-ны өдөр 40,000,000 төгрөг, 2021 оны арваннэгдүгээр сарын 19-ний өдөр 20,000,000 төгрөгийг шилжүүлэн үүргээ гүйцэтгэсэн. Нэхэмжлэгчийн нэхэмжлэлийн зарим шаардлага болох үндсэн төлбөрийн үлдэгдэл төлбөрийг тодорхой хуваарь гарган хуваан төлөхийг зөвшөөрч байна. Зарим шаардлага болох цалингийн зээлийн хүү, орон сууц түрээсийн төлбөр, гэрээнд заагдсан алдангийг төлөхийг эс зөвшөөрч байна. Бараа материалын үнэ өссөн, хил дээр бараа материал гацсан, КОВИД-19 цар тахлын нөлөөгөөр барилгын ажил хойшилсон ч үүргээ зохих ёсоор гүйцэтгэж байсан гэж хариуцагч тал үзэж байна гэв.

ҮНДЭСЛЭХ НЬ: ... Орон сууцны үнэд шилжүүлсэн мөнгөнөөс 47,648,000 төгрөгийг буцаан төлөөгүй үлдсэн байх ба нэхэмжлэгч Иргэний хуулийн 492 дугаар зүйлийн 492.1.1-т заасны дагуу гэрээгээр шилжүүлсэн 47,648,000 төгрөгөө буцаан шаардах эрхтэй байна.

Гэрээний 2.1-т “Гэрээгээр захиалсан орон сууцыг бүтээн байгуулах ерөнхий хугацаа 2021 оны 3 дугаар улирал дуустал байна”, 5.10-т “гэрээний 2.1-т заасан хугацаанд ашиглалтад ороогүй тохиолдолд гүйцэтгэгч нь хугацаа хэтрүүлсэн 31 дэх хоногоос эхлэн хоног тутамд гүйцэтгээгүй үүргийн үнийн дүнгийн 0,1 хувийн алданги тооцож захиалагч талд төлнө” гэж тус тус заажээ.

Барилга хугацаандаа баригдаагүй тул захиалагч буюу нэхэмжлэгч гэрээ цуцлахыг хүссэн ба гүйцэтгэгч буюу хариуцагч гэрээ цуцлах хүсэлтийг хүлээн авч, орон сууцны үнэнд шилжүүлсэн мөнгийг 30 хоногт төлөх тухай мэдэгдлийг захиалагчид 2021 оны аравдугаар сарын 20-ны өдөр өгч байсан бөгөөд гэрээг энэ өдрөөр цуцлагдсан гэж үзэхээр байна.

Гэрээгээр гүйцэтгэгчийн барилга барьж дуусах хугацаа 2021 оны аравдугаар сарын 1-ний өдөр ба хэрэв хэтрүүлбэл алданги тооцож эхлэх хугацаа нь гүйцэтгэгчийн хугацаа хэтрүүлсэн 31 дэх хоног дээрээс тоологдох учиртай байна. Гэтэл талууд гэрээг 2021 оны аравдугаар сарын 1-ний өдөр цуцалсан тул хариуцагчид алданги тооцож гаргуулах үндэслэлгүй байна.

Нэхэмжлэгч орон сууц захиалж бариулах гэрээний дагуу үнийг анх 2021 оны дөрөвдүгээр сарын 5-ны өдөр 63,000,000 төгрөг төлсөн, үүний тулд нөхрийн хамт цалингийн зээл авсан, гүйцэтгэгчийн буруугаас гэрээ цуцлагдсан гэж эдгээр зээлийн хүүг нэхэмжилсэн. М.С 2021 оны дөрөвдүгээр сарын 5-ны өдөр Хас банкнаас цалин барьцаалж 10,000,000 төгрөгийн зээл авсан байх бөгөөд орон сууцны үнийн урьдчилгаа өгсөн хугацаатай давхцаж байна. Энэ зээлийн хүүд нэхэмжилсэн 984,392 төгрөгийг хариуцагчаар төлүүлэх нь зүйтэй байна. Харин түүний нөхөр Г.А 2021 оны гуравдугаар сарын 23-ны өдөр Худалдаа хөгжлийн банкнаас цалингийн 15 сая төгрөгийн зээл авсан гэж түүний хүүг нэхэмжилсэн байх боловч нөхөр өөрөө нэхэмжлээгүй тул нөхрийн цалингийн зээлийн хүү нэхэмжилсэн хэсгийг хэрэгсэхгүй болгов.

Нэхэмжлэгч орон сууц түрээсэлсэн 6 сарын төлбөр 4,800,000 төгрөгийг хариуцагчаас нэхэмжилсэн байх ба нэхэмжлэгч тал бусдын орон сууц хөлслөх гэрээг орон сууц захиалж бариулах гэрээг цуцалснаас хойш, 2021 оны арванхоёрдугаар сарын 8-ны өдөр байгуулсан байх тул нэхэмжлэгчийн энэ шаардлага хангагдахгүй байна.

ТОГТООХ НЬ: Иргэний хуулийн 492 дугаар зүйлийн 492.1.1, 227 дугаар зүйлийн 227.1-ийг баримтлан хариуцагч “ЮТ” ХХК-аас 48,632,392 төгрөгийг гаргуулж, нэхэмжлэгч М.Сд олгож, 12,091,998 төгрөг гаргуулах тухай нэхэмжлэгчийн шаардлагыг хэрэгсэхгүй болгосугай гэжээ.

Энэхүү шүүхийн шийдвэрийн агуулгыг товчлон бичсэн болно.

Эх сурвалж: www.shuukh.mn