Ж.Амаржаргал: Засгийн газар Шүүхийн шийдвэрийг заавал албадуулахгүйгээр биелүүлэх ёстой
Нийслэлийн захиргааны хэргийн анхан шатны шүүхээс “Дүнжингарав” уралдааныг зохион байгуулах Засгийн газрын шийдвэрийн биелэлтийг түдгэлзүүлсэн. Гэвч шүүхийн шийдвэрийг үл тоон “Дүнжингарав” уралдаан зохион байгуулагдсан нь асуудал дагуулаад байгаа юм.
Энэ талаар Нийслэлийн захиргааны хэргийн анхан шатны шүүхийн Олон нийттэй харилцах мэргэжилтэн Ж.Амаржаргалаас тодрууллаа.
-Шүүх “Дүнжингарав” уралдааныг яагаад түдгэлзүүлэх болсон бэ. Захиргааны хэргийн шүүхийн шийдвэрийг Засгийн газар биелүүлэх ёстой юу?
- Нийслэл дэх захиргааны хэргийн анхан шатны шүүхэд 2017 оны хоёрдугаар сарын 24-ний Баасан гарагт ирүүлсэн нэхэмжлэл хүсэлтийн дагуу тус шүүх холбогдох хуулийн дагуу хугацаанд нь буюу 2017 оны гуравдугаар сарын 3-ны өдөр хүсэлтийг хэлэлцэж, морин уралдаан зохион байгуулах тухай Засгийн газрын тогтоолыг түдгэлзүүлэх шүүгчийн захирамж гарсан.
Хариуцагч хуульд заасны дагуу уралдааныг түдгэлзүүлж болохгүй нөхцөл байдал байгаа эсэхийг шүүхэд баримтаар нотлоогүй тул түдгэлзүүлэх хуультай.
Шүүхийн шийдвэр уншиж сонсгомогц хүчинтэй тул заавал албадуулахгүйгээр Засгийн газар биелүүлэх ёстой. Шүүгч түдгэлзүүлэх захирамжаа гаргасан. Захирамжид гомдол гаргах эсэхээ хариуцагч илэрхийлээгүй байна.
Хуулийн заалт:
Захиргааны хэрэг шүүхэд хянан шийдвэрлэх тухай хуулийн
108.2.Шүүхийн шийдвэр танилцуулан сонсгосноор хүчинтэй болно.
12.2.3ахиргааны хэргийн шүүхийн шийдвэрийг Монгол Улсын нутаг дэвсгэрт байгаа холбогдох захиргааны байгууллага, хуулийн этгээд, албан тушаалтан, хувь хүн заавал биелүүлэх үүрэгтэй бөгөөд сайн дураар биелүүлээгүй бол хуульд заасан үндэслэл, журмын дагуу албадан гүйцэтгэнэ.
-Шүүх захирамжаа албадан биелүүлэх боломж байсан уу?
- “Дүнжингарав” хурдан морины уралдаан шүүхийн шийдвэрийг зөрчиж зохиогдож байгаа тухайд бол шүүхийн шийдвэрийг албадан биелүүлэх хүсэлтийг нэхэмжлэгчид шүүхэд гаргаагүй. Энэ тохиолдолд шүүх өөрөө санаачлагаараа албадан гүйцэтгүүлэх боломжгүй.
-Хууль зүйн дэд сайд "Үндсэн хуульд зааснаар Засгийн шийдвэрийг Засгийн газар өөрөө, эсхүл УИХ хүчингүй болгох эрхтэй. Захиргааны шүүх ЗГ-н шийдвэрийг хянахгүй гэж Цэц шийдсэн" гэж олон нийтийн сүлжээнд мэдээлсэн. Энэ тухайд ямар тайлбар хийх вэ?
-Энэ бол 2016 оны долоодугаар сарын 1-нээс өмнө хэрэгжиж байсан хуучин захиргааны процессын хуульд өгсөн Үндсэн хуулийн цэцийн дүгнэлт юм.
Захиргааны хэрэг шүүхэд хянан шийдвэрлэх тухай хуулийн 13 дугаар зүйлийн 13.1-т "Захиргааны хэргийн шүүх Үндсэн хуулийн цэц болон өөр шүүхэд харьяалуулснаас бусад нийтийн эрх зүйн маргааныг хянан шийдвэрлэнэ" гэж Захиргааны хэргийн шүүхийн хянан шийдвэрлэх маргааныг заасан тул энэхүү маргаан нь Цэцэд харьяалсан маргаан бус, хуулийн дагуу Захиргааны хэргийн шүүхийн хянах маргаан гэдэгт эргэлзээ байхгүй. 2016 оны долоодугаар сараас шинэ Захиргааны ерөнхий хууль мөрдөгдөж байгаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
