Г.Ундармаа: Энэ удаад хүүхдийн тасгийг бүрэн шинэчилж, шинэ стандарт тогтоохыг зорьсон

Эрүүл мэндийн байгууллага болон эмнэлгийн үйлчилгээнд тав тухтай орчинг бүрдүүлэхийг зорин ажиллаж байгаа "Итгэлийн танхим" төрийн бус байгууллага зургаа дахь эмнэлгээ тохижуулан хүлээлгэн өгөх үйл ажиллагаа өнөөдөр Хан-уул дүүргийн Нэгдсэн эмнэлэгт боллоо.

Тус арга хэмжээний нээлтэд Нийслэлийн Засаг даргын орлогч Ш.Анхмаа, Хан-Уул дүүргийн ИТХ-ын дарга Г.Цэрэн, Хан-Уул дүүргийн Нэгдсэн эмнэлгийн дарга Б.Бааст, СТА Г.Ундармаа болон Хан-Уул дүүргийн нэгдсэн эмнэлгийн эмч, ажилчид, төсөлд хамрагдсан багийнхны төлөөлөл оролцлоо.

Энэ удаад "Итгэлийн танхим" ТББ-ынхан Хан-Уул дүүргийн Нэгдсэн эмнэлгийн хүүхдийн тасгийг бүрэн тохижуулж, хүлээлгэн өгч байна. 

Өмнө нь эмнэлгүүдийн хүлээлгийн өрөөг нь л тохижуулан хүлээлгэн өгдөг байсан бол энэ удаад тасгийг бүрэн шинэчилж, хүүхдийн тасгийн шинэ стандартыг тогтоохыг зорьж ажиллалаа хэмээн СТА Г.Ундармаа энэ үеэр ярьсан юм. 

Энэ үеэр Нийслэлийн Засаг даргын орлогч Ш.Анхмаа СТА Г.Ундармааг "Нийслэлийн эрүүлийг хамгаалах тэргүүний ажилтан" цол тэмдгээр шагнасан юм.

Хан-уул дүүргийн ИТХ-ын дарга Г.Цэрэн "Хан-Уул дүүргийн Нэгдсэн эмнэлгийн хүүхдийн тасгийг тохижуулж хүлээлгэн өгөх үйл ажиллагаа өнөөдөр болж байна. Хэн бүхэн ийм ажлыг эхлүүлж, дуусгаж чадахгүй шүү дээ. Бидний ажилд маш том туслалцаа үзүүлсэн тэдний багийн хамт олон болон энэ төсөлд гар бие оролцсон бүх хүмүүст талархаж байгаагаа хэлмээр байна" хэмээлээ.

Эх сурвалж: Хан-Уул дүүрэг