ФОТО: Залуучууд гялалзсан Азийн наадам өндөрлөлөө
Шар тивийн спорт оддыг цуглуулсан Азийн XX наадам Японы Айчи муж болон Нагоя хотод нээлтээ хийснээс хойш 14 хоногийн турш үргэлжилсний эцэст өчигдөр өндөрлөлөө.
Монголын баг тамирчид энэ удаагийн Азийн наадмын 34 төрөлд оролцоод 15 медаль хүртэв.
"Mizuho Park Athletic" цэнгэлдэхэд "One Asia" буюу "Нэг Ази" хөтөлбөрийн хүрээнд тус наадамд амжилт үзүүлсэн тамирчдыг онцолсон ёслол ойролцоогоор 90 орчим минут үргэлжиллээ.
Энэ удаагийн наадамд нээлтийн өдрөөсөө эхлээд асуудал дундраагүй. Нагоя хот 2016 онд эрхээ авч, гурван жилийн дараа бэлтгэл ажилдаа орсон ч төсөв хэмнэх гэсэн оролдлого нь араасаа олон бэрхшээл дагуулсан юм. Тамирчдын хотхоны оронд түр байгууламж, томоохон усан онгоц түрээсэлсэн нь тээвэрлэлтийн асуудал дагуулсан. Үүн дээр анх төлөвлөснөөс олон тамирчин оролцох болсон нь зохион байгуулагчдыг багагүй тэвдүүлсэн юм.
Үүний улмаас зарим багийн арын албаныхан хэдэн өдөр хонох газаргүй зүдэрч, тамирчдын байрлаж буй усан онгоцноос тэмцээн болох автобусны хуваарь, тэмцээн болох газар зөрсний улмаас нэг бус тамирчид тэмцээнээсээ хоцорч, сурвалжлах сэтгүүлчдэд ч хүндрэл учруулсан.
Гэхдээ төсөв танах зорилгоор тамирчдын хотхонгүй, шинээр спортын ордон нэмж бариагүй боловч анх төлөвлөж байснаасаа бараг гурав дахин өссөн аж.
Хэдийгээр том наадмыг дагалдах "зовлон" багадаагүй ч залуучууд гялалзсан тэмцээн болов. Нийт 54 дэлхийн дээд амжилт шинэчлэгдсэн бол залуучуудын 11 рекорд, тивийн 89 дээд амжилтыг тэд эвджээ.
Сонирхуулахад дараагийн Азийн наадмыг Катарын Доха хотноо зохион байгуулна. Тодруулбал 2030 оны арваннэгдүгээр сарын 4-нөөс 19-нийг дуустал Катарын хойгт үргэлжлэх аж.
ФОТО
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
