Монгол Улсад барилгын салбар үүсэж, хөгжсөний 100 жилийн ой тохиож буй энэ жил “Нью Прогресс Групп” 25 гаруй жилийн хугацаанд хуримтлуулсан бүтээн байгуулалтын туршлагадаа тулгуурлан барилгын материалын түүхий эдээс эцсийн бүтээгдэхүүн хүртэлх үйлдвэрлэлийн цогц тогтолцоог Монгол Улсад бий болгох стратегийг хэрэгжүүлж байгаа талаараа 40 дэх удаагийн “BARILGA EXPO” олон улсын үзэсгэлэнгийн яармагийн үеэр танилцууллаа. 

---

"ХЭРЭГЛЭГЧЭЭС БҮТЭЭГЧ АРД ТҮМЭН БОЛОХОД НЬЮ ПРОГРЕСС ГРУПП ТҮҮЧЭЭЛЭН АЖИЛЛАНА" 

Нью прогресс групп нь Монголын түүхий эдийг Монголдоо боловсруулж, нэмүү өртөг шингээн үндэсний барилгын материал үйлдвэрлэж, улмаар экспортод гаргах урт хугацааны хөгжлийн бодлогын хүрээнд “Ховд Эко Цемент”, “Ховд Эко Блок”, “ALPHA” эко гипсэн хавтан, “Ховд Эко НЦС” зэрэг төслүүдийг хэрэгжүүлж байгаа юм байна. 

Монгол Улс өмнө нь хэрэглэгч байсан бол одоо бүтээгч ард түмэн болох ёстой. Бид бүтээн байгуулагч компанийн хувьд энэ салбартаа түүчээлж экспортод гаргасны дараа ногоон үйлдвэрлэл болох зэргээр ажиллана. 

Монгол Улсын барилгын салбарын 100 жилийн түүх бол Монгол орны бүтээн байгуулалтын түүх юм. Харин дараагийн 100 жилд Монгол Улс зөвхөн барилга барьдаг бус, барилгад шаардлагатай материалыг өөрсдөө үйлдвэрлэдэг, түүхий эддээ нэмүү өртөг шингээдэг, шинэ технологи нэвтрүүлдэг болох шаардлагатай байна гэдгийг Нью прогресс группийн Дэд Ерөнхийлөгч Д.Базаргүрүү онцлов.  

---

"ХОВД ЭКО ЦЕМЕНИЙН ҮЙЛДВЭР ИМПОРТ ОРЛОХ ҮЙЛДВЭРЭЭС ЭКСПОРТЫН БҮТЭЭГДЭХҮҮН РҮҮ ШИЛЖЛЭЭ"

Баруун бүсийн цементийн хэрэгцээг дотоодын үйлдвэрлэлээр хангах зорилгоор байгуулагдсан “Ховд Эко Цемент” үйлдвэр нь үйл ажиллагаагаа өргөжүүлэн, Монгол Улсын барилгын материалын үйлдвэрлэлийг экспортын зах зээлд гаргах шинэ боломжийг бий болгожээ. 

Тодруулбал орчин үеийн хуурай аргын технологид суурилсан тус үйлдвэр нь жилд 300,000 тонн портланд цемент үйлдвэрлэх хүчин чадалтай ба энэ жилийн наймдугаар сараас эхлэн ОХУ-руу цемент экспортолж эхэлсэн байна. 

Тус үйлдвэр ашиглалтад орсноор Ховд болон баруун бүсийн цементийн хэрэгцээг орон нутагт үйлдвэрлэн хангах, тээвэр ложистикийн зардлыг бууруулах, нийлүүлэлтийн тогтвортой байдлыг нэмэгдүүлэхийн зэрэгцээ бүс нутгийн бүтээн байгуулалтын төслүүдийг дотоодын үйлдвэрлэлээр хангах боломж бүрдсэн байна. Түүнчлэн үйлдвэр нь 350 гаруй ажлын байр бий болгож, орон нутгийн иргэдийн тогтвортой хөдөлмөр эрхлэлтийг дэмжиж байгааг онцлууштай. 

“Ховд Эко Цемент” үйлдвэрийн дэргэд 8 МВт хүчин чадалтай “Ховд Эко НЦС” төслийг хэрэгжүүлж байна"

Үндэсний үйлдвэрлэлийн хүчин чадлыг нэмэгдүүлэхийн зэрэгцээ эрчим хүчний хэрэглээг илүү үр ашигтай, байгаль орчинд ээлтэй болгох нь “Нью Прогресс Групп”-ийн стратегийн зорилтуудын нэг ажээ. 

Иймд тэд “Ховд Эко Цемент” үйлдвэрийн дэргэд 8 МВт хүчин чадалтай “Ховд Эко НЦС” төслийг хэрэгжүүлж байгаа юм байна. Цементийн үйлдвэр жилд ойролцоогоор 18,000 МВт.цаг цахилгаан эрчим хүч хэрэглэдэг бөгөөд үүний 13,000 МВт.цагийг нарны эрчим хүчээр хангах боломжтой тооцоололтой байгаа юм байна. 

Цаашид үйлдвэрлэлийн хэрэгцээнээс давсан эрчим хүчийг баруун бүсийн хэрэглээнд нийлүүлэх боломжийг судалж байгаа нь уг төслийг зөвхөн үйлдвэрийн бус, бүс нутгийн эрчим хүчний тогтвортой байдлыг дэмжих төсөл болгох боломжтойг онцоллоо. 

БАРУУН БҮСИЙН БҮТЭЭН БАЙГУУЛАЛТАД ДОТООДЫН ҮЙЛДВЭРЛЭЛЭЭР ХҮРЭХ “ХОВД ЭКО БЛОК" ҮЙЛДВЭР

Баруун бүсийн барилга, орон сууц, дэд бүтцийн төслүүдэд шаардлагатай ханын материалыг орон нутагт үйлдвэрлэн нийлүүлэх зорилготой “Ховд Эко Блок” үйлдвэр нь “Ховд Эко Цемент”-ийн үйлдвэрлэлийн уялдааг хангах дараагийн чухал төсөл ажээ.

Орчин үеийн CLC технологид суурилсан үйлдвэр нь хөнгөн жинтэй, дулаан хадгалалт сайтай, галд тэсвэртэй, дуу тусгаарлах шинж чанартай дүүргэлтийн ханын блок үйлдвэрлэх бөгөөд жилд 30,000 м³ хүртэл бүтээгдэхүүн үйлдвэрлэх хүчин чадалтай юм байна. 

Өмнө нь баруун бүсийн барилгын материалын тодорхой хэсэг нийслэл болон импортоос хамааралтай байсан бол орон нутагт үйлдвэрлэл бий болсноор бүтээгдэхүүнийг хэрэглэгчдэд ойртуулах, тээвэр ложистикийн зардлыг бууруулах, нийлүүлэлтийн тогтвортой байдлыг хангах боломж бүрдэж байгаа нь онцлууштай. 

МОНГОЛЫН БАЙГАЛИЙН ТҮҮХИЙ ЭДЭЭР “ALPHA” ЭКО ГИПСЭН ХАВТАНГ МОНГОЛД ҮЙЛДВЭРЛЭЖ БАЙНА 

Монгол Улсын барилгын салбарын 100 жилийн ой тохиож буй энэ жил “Нью Прогресс Групп”-ийн охин компани “Эко Драйволл” ХХК-ийн хэрэгжүүлсэн  “ALPHA” эко гипсэн хавтангийн үйлдвэр нь үндэсний үйлдвэрлэлийн салбарт онцлох нэгэн шинэ үйлдвэр болж шилдэг инновац шингэсэн үйлдвэрлэл болсон байна. 

Тодруулбал Монголын байгалийн гөлтгөнө ашиглан гипсэн хавтан үйлдвэрлэж байгаа тус үйлдвэр нь 2026 оны 5 дугаар сарын 24-ний өдөр албан ёсоор нээлтээ хийсэн бөгөөд монгол улсын гипсэн хавтангийн хэрэгцээг 100% хангаж, импортыг орлож чадахаар хэмжээний буюу жилд 10 сая м² буюу 3.5 сая ширхэг гипсэн хавтан үйлдвэрлэх хүчин чадалтай юм байна. 

Монгол Улс гипсэн хавтангийн хэрэгцээгээ 100 хувь импортоор хангаж ирсэн бөгөөд “ALPHA” үйлдвэрийн үйл ажиллагаа эхэлснээр дотоодын түүхий эдийг боловсруулж, эцсийн бүтээгдэхүүн үйлдвэрлэх боломж нэмэгдэж дотоодынхоо хэрэгцээг хангах боломж бүрджээ. 

Үйлдвэрийн үндсэн бүтээгдэхүүнд одоогоор 9.5 мм болон 12.5 мм-ийн гипсэн хавтан багтаж байгаа бөгөөд цаашид ус, чийгт болон галд тэсвэртэй бүтээгдэхүүний төрлийг нэмэгдүүлж, дотоодын барилгын салбарын хэрэгцээг илүү өргөн хүрээнд хангах зорилт тавин ажиллаж байгаа аж. 

“ALPHA” үйлдвэрийн бас нэгэн онцлог нь бүтээгдэхүүн үйлдвэрлэлээс гадна чанар, лабораторийн хяналтад онцгой анхаарч байгаа ба үйлдвэрийн лаборатори нь гөлтгөнөн барьцалдуулагч болон гипсэн хавтангийн төрлөөрөө дагнасан Монголдоо анхдагч лаборатори болж байгаа аж. 

Тус лаборатори нь 25-30 төрлийн үр дүнг гипсэн хавтан дээр шинжилдэг ба үндсэн болон нэмэлт түүхий эдүүдэд хяналт, туршилт, баталгаажуулалтын шинжилгээнүүдийг хийж, бүтээгдэхүүнээ хэрэглэгчдийн гарт өгөхөд ямар ч чанарын асуудалгүй байлгах үүднээс техникийн шаардлага бүрийг нь шалгаж гаргадаг байна. 

"Одоо үйлдвэрлэж буй энгийн гипсэн хавтан нь стандартынхаа дагуу галын урвалын хамгийн багадаа 40 минут хүртэл хугацаанд барьж тэсвэрлэж байгаа"

“Нью Прогресс Групп”-ийн хэрэгжүүлж буй эдгээр үйлдвэрлэлийн төслүүдийн нийтлэг зорилго нь Монгол Улсын байгалийн болон дотоодын түүхий эдэд нэмүү өртөг шингээж, өрсөлдөх чадвартай эцсийн бүтээгдэхүүн үйлдвэрлэх ажээ.

Цемент, блок, гипсэн хавтан зэрэг бүтээгдэхүүн нь барилгын салбарын үндсэн хэрэгцээг хангахаас гадна дотоодын үйлдвэрлэлийн сүлжээг өргөжүүлж, тээвэр ложистикийн зардлыг бууруулах, ажлын байр нэмэгдүүлэх, бүс нутгийн эдийн засгийн идэвхжилийг дэмжих боломжийг бий болгож байна.

“Ховд Эко Цемент” ОХУ-ын зах зээлд гарах эрхээ авсан нь экспортын зах зээлд өрсөлдөх зорилгын бодит эхлэл болсон байна. Нөгөө талд “Ховд Эко НЦС” төсөл нь үйлдвэрлэлийн эрчим хүчний хэрэглээг сэргээгдэх эх үүсвэртэй хослуулах замаар ногоон үйлдвэрлэлийн шийдлийг хөгжүүлж байгаа нь онцлууштай ажил болжээ.