ФОТО: Урианхай сурын харваанд Батчулууны Үнэнбат 27 оноогоор түрүүлж, урианхай сурын ЦЭГЦ ХАРВААЧ боллоо
Тулгар төрийн 2235 жил, Их Монгол Улс байгуулагдсаны 820 жил, Үндэсний эрх чөлөө, тусгаар тогтнолоо сэргээн мандуулсны 115 жил, Ардын хувьсгалын 105 жил, Ардчилсан хувьсгалын 36 жилийн ой, Үндэсний их баяр наадмын Урианхай сурын харваа өчигдөр амжилттай зохион байгуулагдлаа.
Нийт 21 аймаг, есөн дүүргээс Урианхай сурын Дархан мэргэн 1, Хошой мэргэн 6, Улсын мэргэн 15, Улсын цэгц харваач 9, Улсын хавт харваач 10, Аймаг спортын цолтой 200, Залуу харваач 90, нийт 315 харваач цэц сорилоо.
Тэднээс Өвөрхангай аймгийн Баянгол сумын харьяат, Алдар спорт хороо Үндэсний сурын багийн тамирчин залуу харваач (Үндэсний сурын аймгийн онч харваач) Батчулууны Үнэнбат 27 оноогоор түрүүлж, Урианхай сурын ЦЭГЦ ХАРВААЧ цолын болзол хангалаа.
Мөн Баян-Өлгий аймгийн Булган сумын харьяат, Хүч спорт хорооны тамирчин, спортын мастер Энхтөрийн Бумбаяр 25 оноогоор дэд байр эзэлж, Урианхай сурын УЛСЫН МЭРГЭН цолын болзол хангав.
Тэдний араас Баян-Өлгий аймгийн Алтай сумын харьяат, Дотоод хэргийн их сургуулийн тамирчин, Улсын хавт харваач (Урианхай) Батсүхын Энхтүвшин, Говь-Алтай аймгийн Шарга сумын харьяат, Хантайшир зурхай багийн тамирчин Пүрэвдоржийн Лхагвабаяр нар 24 оноогоор удаалжээ. Говь-Алтай аймгийн Шарга сумын харьяат Пүрэвдоржийн Лхагвабаяр Урианхай сурын ХАВТ ХАРВААЧ цолтон боллоо.
Тэгвэл 5-8 дугаар байрт Ховд аймгийн Дуут сумын харьяат, улсын цэгц харваач Дансрангийн Чулуунбат, Баян-Өлгий аймгийн Буянт сумын харьяат, аймгийн мэргэн Буянтогтохын Цогбадрах, Баян-Өлгийн аймгийн харьяат, аймгийн цэгц харваач Амаржаргалын Артаг, Баян-Өлгий аймгийн Буянт сумын харьяат, спортын дэд мастер Баастын Батмөнх нар 23 оноогоор тус тус шалгарсан байна.
ФОТО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
