ХУВААРЬ: Нийслэлийн нутаг дэвсгэрт эзэмшиж буй газрыг өмчлүүлэх аян өнөөдөр эхэлж байна

Гэрэл зургийг mpa.mn

Нийслэлийн есөн дүүргийн нутаг дэвсгэрт эзэмшиж буй газрыг өмчлүүлэх ажлыг эрчимжүүлэх аяныг доорх хуваарийн дагуу зохион байгуулахаар болжээ.

Тодруулбал өнөөдөр Хан-Уул дүүргийн Органик зах, 52-ын захын байршилд газар өмчлөлтэй холбоотой мэдээлэл, зөвлөгөө өгөх цэг 09:00-16:00 цагийн хооронд ажиллах юм байна.

Иргэд хуваарийн дагуу тухайн дүүргийн байршилд очиж газар өмчлөлтйн талаар мэдээлэл, зөвлөгөө авахыг Нийслэлийн Газар Зохион Байгуулалтын Албанаас мэдээлэв.

Аян зургаадугаар сарын 19-ний өдрийг дуустал үргэлжлэх юм байна.

 

Монгол Улсын иргэнд газар өмчлүүлэх тухай хууль 2002 онд батлагдаж, 2003 оны тавдугаар сарын 1-ний өдрөөс хэрэгжиж эхэлсэн. Тус хуулийг 2028 оны тавдугаар сарын 1-ний өдөр хүртэл дагаж мөрдөнө.

Нийслэлийн нутаг дэвсгэрт гэр бүлийн хэрэгцээний зориулалтаар 0.07 га хүртэл газар эзэмшиж буй иргэнд газар өмчлүүлж байгаа бөгөөд 2003-2025 онд нийслэлийн 213,579 иргэнд 11,396 га газрыг өмчлүүлжээ. Ингэснээр нийслэлд бүртгэлтэй нийт иргэдийн 12 хувь нь нэг удаа үнэгүй газар өмчлөх эрхээ эдэлсэн байна.

НИТХ-ын 2025 оны 12 дугаар сарын 5-ны өдрийн 25/134 дүгээр тогтоол, Монгол Улсын Засгийн газрын 2026 оны хоёрдугаар сарын 11-ний өдрийн 46 дугаар тогтоолоор “Монгол Улсын иргэнд 2026 онд өмчлүүлэх газрын нийт хэмжээ, байршил, зориулалт”-ыг баталсан бөгөөд нийслэлийн нутаг дэвсгэрт 2026 онд 2,843 иргэний 156.42 га газрыг гэр бүлийн хэрэгцээний зориулалтаар өмчлүүлнэ.