Н.Эрдэнэбаатар: Олимпын таеквондогийн тивийн тэмцээнийг ирэх тавдугаар сард эх орондоо зохион байгуулна

Гэрэл зургийг MPA агентлагийн онцгой зөвшөөрөлтэйгөөр ашиглав

Олимпын төрөлд багтдаг Дэлхийн Таеквондогийн Холбоо (WT)-ны тивийн аварга шалгаруулах 27 дахь удаагийн тэмцээн ирэх тавдугаар сарын 19-нөөс 25-ныг дуустал Улаанбаатар хотод болно. Тодруулбал энэ тэмцээн нь "M bank arena"-д болох аж.

Дэлхийн 213 орныг эгнээндээ багтаасан тус холбооны шар тивийн шилдгүүдийг эх орондоо хүлээн авах тэмцээнийг Монгол Улсын Ерөнхийлөгчийн ивээл дор зохион байгуулах юм.

Монголын Таеквондогийн Холбоо энэ гэр бүлд 1991 онд элссэн байдаг. Өмнөд Солонгосоос гаралтай олимпын таеквондогийн төрөл анх 1988 оны Сөүлийн олимпод үзүүлэх тоглолтоор, 1992, 1996 оны олимпод туршилтаар оролцсон бол 2000 оноос хойш үндсэн төрөлд багтах болжээ.

Хоёр жилд нэг удаа болдог Азийн Аварга Шалгаруулах Тэмцээн (ААШТ) нь тивдээ олимпын хамгийн өндөр чансааны оноо олгодог гэдгээрээ онцлог аж.

Тэмцээнийхээ талаар Монгол Улсын Гавьяат дасгалжуулагч, Монголын Таеквондогийн Холбооны ерөнхий нарийн бичгийн дарга Н.Эрдэнэбаатар "Манай холбоо маш хариуцлагатай тэмцээнийг эх орондоо зохион байгуулахаар төлөвлөж байна. Энэ удаагийн тэмцээний гол онцлог нь ес дэх удаагийн Пүмсэ, 27 дахь удаагийн тулааны, 11 дэх паратаеквондогийн төрлөөр тивийн аваргыг тодруулна. 

Урьдчилсан байдлаар 45 орны 1,100 орчим тамирчин, албаны хүмүүс оролцохоор төлөвлөж байна.

Түүнчлэн анх удаа жин бүрийн эхний долоон байрт шалгарсан тамирчид ирэх есдүгээр сард Японд болох Азийн наадмын эрх авна. Тиймээс тивийн шилдгүүд Улаанбаатарт ирнэ гэсэн хүлээлттэй байна.

Эх орондоо болох тэмцээнээр амжилттай оролцохын тулд манай тамирчид өнгөрсөн нэгдүгээр сараас хойш цугларалтад гарсан. 

Манай улс энэ тэмцээнийг зохион байгуулснаар Монголын таеквондогийн хөгжилд түлхэц болно гэж үзэж байгаа. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Тэмцээндээ зориулж Дэлхийн Таеквондогийн Холбоонд тусгайлан хүсэлт гаргаад үзүүлэх тоглолтын шигшээ багийн тоглолтыг нээлтийн ёслолд оролцоно. Энэ баг нь АНУ-ын "America's Got Talent" телевизийн шоуд амжилттай оролцож байсан юм. Мөн ирэх тавдугаар сард Улаанбаатар марафон болох үеэр Сүхбаатарын талбайд тус багийнхан үзүүлэх тоглолт хийхээр төлөвлөж байна.

Манай тамирчдын хувьд бүх төрлүүдэд оролцохоор төлөвлөж байна. Бидний хувьд Японд болох Азийн наадмын эрх авах гол зорилготой.

Маскот буюу бэлгэдлийн хувьд олон хувилбараас сонголт хийсэн. Эцэст нь морь жил гарсан учраас морийг бэлгэдлээрээ сонгохоор шийдсэн юм" гэв.

Тивийн аварга шалгаруулах тэмцээнийг эх орондоо зохион байгуулснаар цаашлаад олимпын оноо олгох нээлттэй тэмцээнийг тогтмол зохион байгуулахад нөлөөлнө гэж үзэж байгаагаа холбооныхон онцоллоо.