Д.Мөнхбаатар: Хотула аппликэйшнд “Тавантолгой түлш” цэс нэмсэн. Айл өрхүүд коксон түлшний урьдчилсан захиалгаа өгөх боломжтой
Нийслэлийн хэмжээнд гэр хорооллын айл өрхүүд гуравдугаар сарын 1-ний өдрөөс эхлэн зөвхөн Хотула аппликейшн болон иргэний үнэмлэх ашиглаж коксон түлш худалдан авахаар болсон.
Уг асуудлаар Нийслэлийн Агаар, Орчны Бохирдолтой Тэмцэх Газрын дарга Д.Мөнхбаатар “Гуравдугаар сарын 1-нээс “Сайн” карт ашиглахыг зогсоож, түлш худалдан авахад зөвхөн Хотула аппликэйшн болон иргэний үнэмлэх ашиглана.
Хотула аппликэйшнд “Тавантолгой түлш” гэсэн шинэ цэс нэмсэн. Ингэснээр айл өрх, иргэд түлшнийхээ хэрэглээг хянах, ойролцоох борлуулалтын цэг, цэгүүд дэх түлшний нөөцийг харах, түлшний урьдчилсан захиалгаа өгөх боломжтой.
Тус аппликэйшныг ашигласнаар түлш зорилтод иргэдэд хүрч, давхар ашиглаж дамлан зарах зэрэг асуудлуудыг зогсооход тусална” гэж мэдээллээ.
Хэрэглэгчид уг аппликэйшнийг гар утсандаа татан авч, бүртгэлээ хэрхэн баталгаажуулах зааврыг авахыг хүсвэл "Тавантолгой түлш" ХХК-ийн 7011-9400 болон 7272-9200 дугаарын утсанд хандахыг зөвлөв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
