Буйр нуурын мөс цөмөрсний улмаас машинтай зорчиж явсан дөрвөн хүн осолдсон байна

Нуурын мөс цөмөрсний улмаас дөрвөн хүн эндсэн харамсалтай явдал Дорнод аймгийн Халхгол суманд энэ сарын 24-ний өдөр бүртгэгджээ.

Тодруулбал тус сумын 2 дугаар багийн Хошуу бургас гэдэг газар /аймгийн төвөөс зүүн урд зүгт 330 км, сумын төвөөс баруун хойд зүгт 70 км/ Буйр нуурын мөсөн дээгүүр зорчиж явсан “Toyota Prius-30” загварын зургаан зорчигч/3 том хүн, 3 хүүхэд/-той суудлын автомашин нуурын мөс цөмөрсний улмаас живсэн байна. Автомашинд зорчиж явсан хоёр хүн /1 том хүн, 1 хүүхэд/ эсэн мэнд гарч, дөрвөн хүн /2 том хүн, 2 хүүхэд/ живсэн тухай дуудлагыг өчигдөр буюу хоёрдугаар сарын 24-ний 13:18 цагт онцгой байдлын байгууллагад өгчээ. Дуудлагын дагуу тус аймгийн Онцгой байдлын газрын Эрэн хайх, аврах ангийн алба хаагчид ажиллаж байна. 

Цаг уурын байгууллагын гаргасан мэдээгээр хоёрдугаар сарын хоёрдугаар 10 хоногийн байдлаар манай орны дунд болон томоохон голуудын мөсний зузаан өөрчлөлт багатай байгаа бол жижиг голууд ёроолдоо хүртэл хөлдсөн хэвээр байна. Тухайлбал:

• Хөвсгөлийн уулсаас эхтэй Эг голын мөсний зузаан Хатгал тосгон орчимд 5 см нимгэрсэн,
• Хөвсгөл нуурын мөсний зузаан өмнөх арав хоногоос 6 см нэмэгдэж, 95-107 см зузаан мөсөн бүрхүүлтэй болсон нь өнгөрсөн оны мөн үеийнхээс 5-10 см ахиу байна,
• Сэлэнгэ мөрний дагууд харз гүйх үзэгдэл ажиглагдсан хэвээр байна.

Цаашид гол мөрөн, нуурын мөсний зузаан харилцан адилгүй нимгэрнэ. Тиймээс иргэд, малчид, тээвэрчид, аялагчдыг мөсөн дээгүүр явганаар болон авто тээвэр хийхгүй байхыг онцгой байдлын албанаас анхаарууллаа.