Сар шинийн баярт зориулсан ахмадын барилдаанд дархан аварга А.Сүхбат түрүүллээ
Сар шинийн баярт зориулсан өсвөрийн болон ахмадын бөхийн барилдаан өнөөдөр Монгол Бөхийн Өргөө (МБӨ)-д боллоо.
Ахмадын барилдаанд дархан аварга А.Сүхбат, улсын начин Л.Цэвээн, Д.Цогзолдорж тэргүүтэй улс, аймгийн цолтой 50-аас дээш насны 21 бөх зодоглосон юм.
Улмаар дархан аварга А.Сүхбат аймгийн арслан Ч.Эрдэнэчулуунаар зургаа давж, сар шинийн барилдаанд түрүүлэв. Их шөвөгт аймгийн начин Б.Пүрэвсүрэн үлджээ.
Энэ барилдаанд Увс аймгийн Тэс сумын харьяат, улсын начин Л.Цэвээн зодоглосон нь хамгийн ахмад бөх байв. Тэрбээр ирэх аравдугаар сард 70 нас хүрэх юм.
Өсвөрийн барилдааны 15-16 насны ангилалд Увс аймгийн Тэс сумын залуу бөх А.Баяржавхлан түрүүлсэн бол 13-14 насны ангилалд Г.Түвшинтогтох, 11-12 насны ангилалд Сэлэнгэ аймгийн Мандал сумын харьяат Х.Мөнхбаатар нар өнгөлжээ.
ФОТО
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
