А.Энхжаргал: Өглөө үйлчилгээнд гарах гэж байсан автобусны жолоочийг ариун цэврийн өрөө орох хооронд тээврийн хэрэгсэл нь алдагдсан
Жолооч нь ариун цэврийн өрөө орох хооронд автобус нь алдагдсан хэрэг өнөөдөр өглөө гарчээ.
Энэ тухай Нийслэлийн Нийтийн Тээврийн Бодлогын Газрын тээвэр зохицуулагч А.Энхжаргал "Өнөөдөр буюу нэгдүгээр сарын 30-ны өглөө "Сайхан ирээдүй" компанийн Ч:27 Өвөр Согоот-Вокзал чиглэлд үйлчилгээнд гарах гэж байсан нийтийн тээврийн автобусны жолооч ариун цэврийн өрөө орох хооронд тээврийн хэрэгсэл нь алдагдсан.
Тухайн автобус 07:01 цагт Вокзалаас эх авч Өвөр Согоот чиглэлд явах гэж байсан юм.
Тээврийн хэрэгслийг авч явсан этгээд унтраасан учраас камераар харах боломжгүй болсон тул Авто тээврийн хяналтын улсын байцаагч, Замын Хөдөлгөөний Удирдлагын Төв, Тээврийн Цагдаагийн Албанд энэ тухай мэдээллийг дамжуулсан. Ингээд Авто тээврийн хяналтын улсын байцаагч Ж.Бум-Эрдэнэ тухайн тээврийн хэрэгслийг Моносын уулзвар өнгөрөөд зогсож байхад нь илрүүлж, хоёр цаг орчмын дотор оллоо" гэж мэдээллээ.
Автобусан дотор согтуу нэг иргэн байгааг Тээврийн Цагдаагийн Газарт хүлээлгэж өгч байна гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
