Гэрэл зургийг MPA агентлагийн онцгой зөвшөөрөлтэйгөөр ашиглав

Энэ сарын 15-ны өдрөөс ихэнх нутгаар хүйтний эрч эрс чангарах төлөвтэй байгаа тул осголт, хөлдөлтөөс сэрэмжлэхийг цаг уурын байгууллагаас зөвлөлөө.

Хүйтний улмаас бие махбод болон эд эсэд учрах хөнөөлийг хөлдөлт гэнэ. 

Хүний  биед дулаан зохицуулалтын систем ажиллаж байдаг боловч гаднын хүчин зүйлс давамгайлсан үед дулааны зохицуулалт алдагдан хөлдөлт үүсдэг байна. Хөлдөлтийн үед ерөнхий биеийн осголт болохоос гадна биеийн ил хэсэг, хамар, хацар, чихний дэлбэн, гар, хөлийн хуруу хөлддөг. 

Хөлдөлт ихэвчлэн өвлийн улирлын агаарын хэм -20..-10 градусаас доош үед үүсдэг гэж үзэх боловч гадаа удаан байх, их чийглэг, хүчтэй салхитай үед хавар, намрын улиралд 0 градусаас дээш хэмд хөлдөх нь бий. 

Осголт гэдэг нь хүйтэн, нойтон, салхи, шуургатай газар удаан хугацаагаар байснаас биеийн ерөнхий дулаан буурч, бүх эрхтэн тогтолцооны талаас өөрчлөлт гарахыг хэлнэ. 

Хүний биеийн температур 28-32 хэм болоход хөдөлгөөн удааширч, царай хөхөрч, зүрх судасны үйл ажиллагаа алдагдан 28 хэмээс доош ороход амь насанд аюул учирдаг

Хүний биеийн температур 36, 37 градус байдаг бол даарч бээрэн биеийн халуун 32-35 хэм болоход хөнгөн зэргийн осголт явагдаж, 28-32 хэм болоход хөдөлгөөн удааширч, царай хөхөрч, зүрх судасны үйл ажиллагаа алдагдан 28 хэмээс доош ороход ухаан алдаж, таталт өгөн үндсэндээ эргэшгүй процесс явж хүний амь насанд аюул учирдаг. 

 

Спиртийн төрлийн зүйл бүү уу.  

Захын судас тэлснээс биеийн дулаанаа их хэмжээгээр алдаад зогсохгүй хүйтний хэмийг буруу тооцно. 

 

Хүйтэнд тамхи бүү тат  

Тамхи захын судасны эргэлтийг багасгадаг. 

 

 

ЗӨВЛӨГӨӨ

• Сул чөлөөтэй буюу байцаа шиг хувцасла. Ингэснээр агаарын давхарга үүсэж дулааныг сайн хадгалдаг. 
• Бариу гутал, ороолтгүй байх, чийгтэй бохир оймс зэрэг нь хөлдөлтийг хурдан явагдахад хүргэнэ. 
• Малгай, ороолт зүүж, бээлий өмсөж хэвших, 
• Дээрх зүйлс нь цэвэр даавуун, хөвөн, ноосон, материалаар хийгдсэн байвал зөв.
• Хүйтэнд төмөр, алт, мөнгөн гоёл зүүх хэрэггүй. 
• Хүйтэнд удаан хугацаагаар явах бол биеэ тосолж байх хэрэгтэй. 
• Салхинаас болгоомжлон гадаа нойтон үстэй гарахгүй байх 
• Санамсаргүйгээр хувцсаа норговол хурдан хуурай хувцас өмсөх хэрэгтэй. 
• Хүүхдүүд тоглоомдоо улайраад осгох, хөлдөх нь бий учир 15-20 минут тутамд дулаацуулж байх хэрэгтэй. 
• Цаг агаарын мэдээгээ тогтмол сонсож ажлаа төлөвлөн, амьдрал ахуйдаа хэрэглэж сурах хэрэгтэй.