Б.Энхтүвшин: Энэ сард авахаар баталгаажуулсан шатахуун түлшний 50 хүрэхгүй хувь нь импортоор орж ирсэн
Шатахуун, түлшний хангамж нийлүүлэлтийн асуудлаар Аж үйлдвэр, эрдэс баялгийн дэд сайд Б.Энхтүвшин, Аж Үйлдвэр, Эрдэс Баялгийн Яам(АҮЭБЯ)-ны Төрийн нарийн бичгийн дарга Б.Дашпүрэв нар өнөөдөр мэдээлэл хийлээ.
Дэд сайд Б.Энхтүвшин "Манай улс шатахуун, түлшний хэрэглээнийхээ 95 хувийг Оросын Холбооны Улсаас, таван хувийг БНХАУ-аас импортоор хангаж байгаа. Энэ сард ОХУ-аас 83,600 тонн АИ-92 шатахуун, 134,240 тонн Дизель түлш, 1,560 тонн АИ-95 шатахуун авахаар гэрээгээ хийж, баталгаажуулсан.
Дэлхий нийтээрээ мэдэж байгаачлан ОХУ-ын дотоод нөхцөл байдал харьцангуй хүндрэлтэй байх шиг байна. Гэхдээ Оросын ард түмэн манай улсад хамаг боломж бололцоогоороо шатахуун түлш нийлүүлж байна" гэлээ.
Улаанбаатар хотод 280 гаруй ШТС байна. 1/3-ийг ээлжлэн хангаж байгаа. Би ажлаа аваад дөрөв хонож байгаа. Ажлаа авсан оройгоос газар дээр нөхцөл байдал ямар байгаатай танилцаж ажилласан. Тухайлбал Энхтайваны гүүрний доод хэсэгт байрлах Петровис 19-20 тонн АИ-92 тонн шатахуунаар 24 цагийн борлуулалтаа хийдэг байсан бол одоо 10 цаг болоод дуусаж байна. Оочерлож буй иргэдтэй уулзахад хоёр жолооч нь шар нь ассан, нэг жолооч нь хоёр зураас бензинтэй, бусад нь талаас дээшээ бензинтэй байна гэж байсан. Иймэрхүү байдлаар өдрийн хэрэглээний бензин хүрэхээ байсан нь иргэд банкандаа 50 хувийн нөөцтэй яваад байгаатай холбоотой байх.
Төвийн болон хангайн бүсийн аймгуудын хэрэглээг Улаанбаатар хотоос хангадаг. Дархан, Эрдэнэт рүү ачилт хийсэн. Өчигдөр 16 вагон Эрдэнэт, Дарханд буугаад Хөвсгөл8 Увс, Архангай, Булган руу тараагдаж байгаа. Зүүн аймгууд харьцангуй хэвийн байгаа" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
