"Томуу, томуу төст өвчин 12-р сарын 15-нд оргил үедээ хүрнэ. Өнгөрсөн амралтын өдрүүдэд БЗД, СХД-т ачаалал хүндэрсэн"
ЭМЯ-аас томуу, томуу төст өвчний нөхцөл байдлын талаар өнөөдөр мэдээлэл өглөө.
Жил бүр хүн амын дунд томуугийн H3N2 вирус, H1N1 вирус, В-н хүрээний вирус, амьсгалын замын синцитиаль вирус эргэлтэд ордог бөгөөд томуу томуу төст өвчнөөр өвчлөгчдийн 81 хувийг бага насны хүүхдүүд, өвчлөлийн хүндрэлийг 50-аас дээш насны ахмадууд эзэлдэг байна.
Томуу томуу төст өвчний үүсгэгчийн:
- 60.5 хувийг H3N2 вирус
- 10.4 хувийг синцитиаль вирус
- 29 хувийг бусад вирусийн төрөл эзэлж байна.
Сүүлийн долоо хоногт манай улсад H3N2 вирусийн илэрц 32.5 хувиар нэмэгдсэн ба АНУ, Англи, Японд маш их дэгдэлттэй байгаа юм байна.
Томуу томуу төст өвчний өвчлөл 12-р сарын 15-нд оргил үедээ хүрнэ. Өнгөрсөн амралтын өдрүүдэд БЗД, СХД-т ачаалал хүндэрчээ. Иймд нийт иргэдийг маскаа тогтмол зүүхийг ЭМЯ-наас уриалав.
Томуу томуу төст өвчнөөр өвчилсөн хүмүүсийг хүлээн авах 1,100 ор байгаа бөгөөд цаашид ХӨСҮТ, Монгол Японы хамтарсан эмнэлэг, Цэргийн төв эмнэлэг, Ахмадын сувилалд 740 орыг нэмэлтээр гаргана гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
