Х.Нямбаатар: Гандангийн дэнжийн айлуудын чөлөөлсөн газар дээр барилга байгууламж барихгүй

Гэрэл зургийг MPA агентлагийн онцгой зөвшөөрөлтэйгөөр ашиглав

Баянгол дүүргийн 16 дугаар хорооны нутаг дэвсгэр Гандангийн дэнжийн айлуудын газрыг чөлөөлж эхэлжээ.

Тус дэнж дээр 1,300 орчим айл өрх байдгаас хашаа байшинд амьдарч гал түлдэг 550 өрх байна. Эдгээр айлын газрыг чөлөөлөх шийдвэр гаргаж, 55 нэгж талбарыг чөлөөлөхөөс 35 нэгж талбарыг чөлөөлсөн бол 12 нэгж талбарт үнэлгээ хийлгэжээ. Харин 8 айлтай уулзалт зохион байгуулаагүй байна. Энэ жил 55 айлтай газар чөлөөлөлтийн гэрээ байгуулж, төлбөрийг төлөх аж.

Чөлөөлсөн газрыг юунд ашиглах талаар хотын дарга Х.Нямбаатар "Гандангийн зүүн талын айл өрхүүдийн газрыг чөлөөлнө. Чөлөөлсөн газар дээр өндөр барилга байгууламж бус Гандангийн зүүн хаалга руу орох явган чулуун шаттай, ногоон байгууламж бүхий зурвасыг байгуулахаар зураг төслийг гаргасан.

Бэтүб хийдээс Гандан хүртэл өргөн гүүрэн байгууламж барина. Ингэснээр Монгол Улсад ирсэн жуулчид Урт цагааны гудамжнаас бэлэг дурсгалын зүйл худалдаж авчхаад Гандантэгчинлэн хийдэд ирж залбирч, сүсэглэх, үзэж сонирхох, зургаа авхуулах боломжтой болно. Өөрөөр хэлбэл автомашины хөдөлгөөнтэй давхцахгүй, гүүрэн байгууламжаар явган алхаж Гандангийн зүүн хаалгаар орох тохижилтыг хийхээр төлөвлөсөн. Шашны эд зүйлс зардаг павильон байгуулна. Энэхүү ажлыг ирэх хавар хийнэ. Газраа чөлөөлөхөөс татгалзсан хоёр айлыг хотын бүтээн байгуулалтын ажилд дэм туслалцаа үзүүлэхийг хүсэж байна. Бид зах зээлийн хамгийн боломжтой үнийг тэдэнд санал болгож байгаа. Хотын төвд ганц хашаанаас болж, ажлаа саатуулмааргүй байна.

Арванхоёрдугаар сарын 15-нд НИТХ-аар 2026 оны нийслэлийн төсөв батлагдана. Энэ төсөвт Гандангийн тохижилтын ажлын зардлыг оруулсан байгаа юм.

Гандангийн дэнжийн айл өрхүүдийг мод, нүүрс түлүүлэхгүй байх шийдвэр гаргасан" хэмээн мэдээллээ.

Түүний үзүүлсэн Гандангийн дэнжийн төлөвлөлтийн зураг:

 

2026 онд хийгдэх газар чөлөөлөлтийн тухайд:

• Ирэх онд Сүхбаатар дүүргийн Ногооннуур орчмын газрыг чөлөөлж, Сүхбаатарын талбайтай дүйцэхүйц хэмжээний том талбай гаргаж, олон нийтийн соёл урлагийн арга хэмжээ зохион байгуулна.
• Чингэлтэй дүүргийн Зургаан буудал, Сүхбаатар дүүргийн Дамбадаржаад 70 га, Баянгол дүүргийн Гандан, Баянзүрх дүүрэгт Шархад, Цайз, Яармагийн 34 дүгээр сургуулийн хойд талаас газар чөлөөлж эхэлнэ.
• Сонгинохайрхан дүүргийн Ханын материал орчимд 236 нэгж талбар чөлөөлөхөөс гурван айл үлдсэн.
• Тус дүүргийн 4, 8, 9, 10, 40 дүгээр хороонд 50 га газар чөлөөлөлт эрчимтэй явагдаж байгаа.
• 2040 он хүртэл Улаанбаатар хотыг хөгжүүлэх ерөнхий төлөвлөгөөг УИХ-д өргөн барьсан. Ерөнхий төлөвлөгөөг батлаад өгвөл гэр хорооллыг, замбараагүй барьсан барилгуудын газрыг ч чөлөөлнө.
• Улаанбаатар хот Газар чөлөөлөлтийн сангийн хуультай болсон. Санг энэ онд мөнгөжүүлнэ. Урт хугацаатай төслөөр баригдсан орон сууцнуудыг зарсан мөнгийг уг санд төвлөрүүлэх боломжтой болсон. 
• Газар чөлөөлөлтийн аянд нэгдэхийг уриалж байна. Айл өрхүүдийн газрыг чөлөөлөхдөө зах зээлийн хамгийн жишиг үнийг санал болгож байгаа. Хаалгаа тайлж өгөөд бидний саналыг сонсоосой гэв.