"Эрүүл мэндийн салбарын төсвийн санхүүжилтийг нэмэхгүй бол эмч нар үндэсний хэмжээнд ажил хаяна"
Эрүүл мэндийн салбарын эмч, ажилтнууд хөдөлмөрлөх эрхийнхээ төлөө цалин хөлсөө нэмэгдүүлж 3.5 сая төгрөгт хүргэх тэмцэл хөдөлгөөнийг эхлүүлээд байгаа юм. Уг асуудалтай холбоотойгоор МҮЭХ болон Монголын Эрүүл мэндийн ажилтны ҮЭ-ийн холбооноос цаг үеийн асуудлаар өчигдөр орой мэдээлэл хийлээ.
"Эвлэлдэн нэгдэж үзэл бодлоо илэрхийлж байхад яамнаас дарамтлаад байдаг нь Ардчилсан нийгэмд байх ёс зүй мөн үү?"
Үргэлжлүүлэн тус холбооны дарга Ч.Нарантуяа "Энэхүү тэмцэлтэй холбогдуулан байгууллагын дарга нарыг ҮЭ хурал хийх юм бол арга хэмжээ авна, албан тушаалтай чинь ярина гэсэн дарамт шахалтыг өгөөд эхэлсэн байна. Хүмүүсийн эвлэлдэн нэгдэх эрхэд халдаж ажил хаялтад оролцохгүй гэх шийдвэрийг гаргатал нь нөлөөлж байгаа нь ил тод дарамт юм. Маргааш хурлаа хийх гэж байгаа эмнэлгүүдийн ҮЭ-ийг хурлыг нь хийлгүүлэхгүй, нэг ч хүнийг гарын үсгийг зуруулахгүй гэж дарамталж байна. Эвлэлдэн нэгдэж үзэл бодлоо илэрхийлж байхад яамнаас дарамтлаад байдаг нь Ардчилсан нийгэмд байх ёс зүй мөн үү?
Олон жил цалин багатай ажилласан ч өргөсөн тангарагтаа үнэнч гээд юм хэлдэггүй байсан. Одоо цаг үе өөр болсон. Улсын төсөв хэлэлцэж байгаа энэ үед Эрүүл мэндийн салбарын санхүүжилтийг нэм гэсэн шаардлагыг тавьж байгаа. Төсвийн олон нээлттэй хэлэлцүүлгийг хийсэн ч нэг ч саналыг нь оруулаагүй байна.
"Ард иргэдийг үх гэж байгаа юм уу?"
Түүнчлэн Эрүүл мэндийн даатгалын санхүүжилтийг 3 их наядаар төсөвлөсөн байхад УИХ-д 2.2 их наяд болгож буруулсан байна. Ард иргэдийг үх гэж байгаа юм уу? Одоо эмнэлгүүдийн төсөв нь хүрэхгүй бэрхшээлтэй байна. Цаашид энэ тэмцлийг үр дүнд хүртэл нь зохион байгуулна. Ажил хаялтаа эхлүүлнэ. Үүнээс өөр гарах арга зам алга.
Тусгай мэргэжил шаардахгүй энгийн ажилтнуудаас ч бага цалин авч байна. Эмнэлгийн дарга нарыг яамнаас нь дарамтална. Ажилчид нь цалин, илүү цагийг өг гээд дарамтална. Эмнэлэг шал угаах вок, савангийн ч мөнгөгүй болчихсон байгаа шүү дээ. Энэ нь зөвхөн эрүүл мэндийн салбарын ажилтнуудын цалин хөлснөөс илүү Монгол улсын иргэдийн амь нас дээсэн дөрөөн дээр байгаа гэдгийг олон удаа хэлж байгаа.
Маш олон танаж болох зардлуудыг танаж болохгүй байгаа юм уу? Энэ бол засаг төрийн боомилолтод ордог асуудал биш. Ардчилсан нийгэмд ажиллаж байгаа хөдөлмөрчид эрхээ эдлэх нь туйлын зөв" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
