• 12 сарын 13, Бямба
|
Уншиж байна ...

УИХ-ын дарга асан Д.Амарбаясгаланг авлигын хэрэгт холбогдуулан яллагдагчаар татжээ

Н.Эрхбаяр, iKon.mn
2025 оны 10 сарын 27
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын дарга асан Д.Амарбаясгаланг авлигын гэмт хэрэгт холбогдуулан яллагдагчаар татсан байна. 

Энэ талаар Нийслэлийн прокурорын газрын хяналтын прокурор Ч.Өлзийсайхан мэдээлэл өглөө. 

Тэрбээр "УИХ-ын гишүүн Д.Амарбаясгаланд мөрдөх байгууллагаас эрүүгийн хуулийн тусгай ангийн 22.1.2, 22.10.3, 22.4 хэсэгт зааснаар эрүүгийн хэрэгт яллагдагчаар татах саналтай ирүүлсэн.

Прокурорын байгууллагаас хэргийг хянаад УИХ-ын гишүүн Д.Амарбаясгаланг эрүүгийн хуулийн тусгай ангийн 22.1.2, 3 дахь хэсэгт заасан улс төрд нөлөө бүхий этгээд эрх мэдэл албан тушаалын байдлаа урвуулан ашиглах гэмт хэрэгт, мөн эрүүгийн хуулийн тусгай ангийн 22.10.3-д заасан үндэслэлгүйгээр хөрөнгөжих, эрүүгийн хуулийн тусгай ангийн 22.4-д заасан их хэмжээний хахууль авах гэмт хэрэгт яллагдагчаар татан шалгуулахаар Авлигатай тэмцэх газарт хүргүүлсэн. 

Уг хэргийг хянаж үзээд өнгөрсөн долоо хоногт мөрдөн шалгах ажиллагаанд шилжүүлсэн. УИХ-ын гишүүний бүрэн эрхээс түдгэлзүүлэх асуудлыг мөрдөн шалгах ажиллагаа явуулж буй байгууллагаас санал гаргаж, прокурор үндэслэлтэй гэж үзвэл шүүхээр эцэслэн шийдвэрлэгдэнэ.

Одоогоор мөрдөн шалгах байгууллагаас УИХ-ын гишүүний бүрэн эрхээс түдгэлзүүлэх санал ирүүлээгүй байна" гэв.

Эрүүгийн хууль: ХОРИН ХОЁРДУГААР БҮЛЭГ АВЛИГЫН ГЭМТ ХЭРЭГ

22.1 дүгээр зүйл.Эрх мэдэл, албан тушаалын байдлаа урвуулан ашиглах: 2.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд ажиллах эрхийг хоёр жилээс найман жил хүртэл хугацаагаар хасаж хоёр жилээс найман жил хүртэл хугацаагаар хорих ял шийтгэнэ.
22.4 дүгээр зүйл.Нийтийн албан тушаалтан хахууль авах: 1.Нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлсний хариуд, эсхүл хэрэгжүүлэхийн тулд, эсхүл хэрэгжүүлээгүйн хариуд, эсхүл хэрэгжүүлэхгүй байхын тулд, эсхүл гүйцэтгэх ёсгүй үйлдлийг хийсэн, эсхүл хийхийн тулд шууд, эсхүл бусдаар дамжуулан хахууль өгөхийг шаардсан, авсан бол нийтийн албанд ажиллах эрхийг хоёр жилээс найман жил хүртэл хугацаагаар хасаж хоёр жилээс найман жил хүртэл хугацаагаар хорих ял шийтгэнэ.
22.10 дугаар зүйл.Үндэслэлгүйгээр хөрөнгөжих: 1.Нийтийн албан тушаалтны хөрөнгө, орлого их хэмжээгээр нэмэгдсэн нь үндэслэлгүй болох нь тогтоогдсон бол үндэслэлгүйгээр нэмэгдсэн хөрөнгө, орлогыг хурааж нийтийн албанд ажиллах эрхийг хоёр жилээс найман жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.