Эрх баригч намын гишүүд бүлгээ хуралдуулахыг шаардав
Монгол Улсын Их Хурлын нэр бүхий гишүүд цаг үеийн асуудлаар мэдээлэл хийлээ.
УИХ-ын гишүүн Н.Наранбаатар "УИХ дахь МАН-ын бүлгийн 38 гишүүн нэгдэж, бүлгээ яаралтай хуралдуулах тухай шаардлагыг хүргүүллээ. Харамсалтай нь бүлгийн дарга маань эзгүй байсан тул ажлын албанд нь өглөө. Бүлэг маань сүүлийн хоёр удаа хуралдаагүй. УИХ-д олонхыг бүрдүүлж байгаа МАН-ын бүлэг хуралдаж улс төрийн шийдвэр гаргах шаардлагатай байна. Гишүүд бүлгийн хурал хийхийг янз бүрээр шаардсан ч үр дүн гарахгүй байгаа учраас бүлгийн гишүүдийн олонх буюу 38 гишүүн гарын үсэг зурж, өнөөдрийн 16:00 цагт бүлгээ хуралдуул гэдэг шаардлагыг албан бичгээр хүргүүллээ.
Хэрэв өнөөдрийн 16:00 цагт бүлгийн хурлаа зарлахгүй бол шаардлага хүргүүлсэн 38 гишүүн өөрсдөө хуралдана. Бүлэг дөрвөн дэд даргатай. Дэд дарга нар хурлаа удирдана" гэв.
УИХ-ын гишүүн Б.Заяабал "Цаг үеийн хоёр чухал асуудал байна. Ерөнхий сайдыг болон УИХ-ын даргыг огцруулах тухай асуудал. Бүлгээрээ хуралдаж эдгээд асуудлыг яаралтай шийдвэрлэх шаардлагатай байна. Бидний тавьж байгаа шаардлагад бүлгийн дэд дарга нараас У.Отгонбаяр нэгдэж гарын үсэг зурсан" гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
