УИХ-ын дарга Д.Амарбаясгаланг огцруулах тухай албан бичигт 67 гишүүн гарын үсэг зуржээ
УИХ-ын дарга Д.Амарбаясгаланг огцруулах тухай албан бичгийг өргөн барих гэж байгаа талаараа нэр бүхий гишүүд мэдээлэл хийлээ.
Энэ талаар УИХ-ын гишүүн З.Мэндсайхан “Монгол Улсын Их Хурлын дарга Д.Амарбаясгаланг огцруулах тухай санал гаргаснаа танилцуулъя. Нэр бүхий гишүүд УИХ-ын дарга Д.Амарбаясгалангаас нэр холбогдоод байгаа нүүрсний хулгай, авлига, албан тушаалын байж болзошгүй гэмт хэргийн шинжтэй асуудлаар бүрэн эрхээсээ сайн дураар түдгэлзэн шалгуулахыг шаардсан. Гэвч уг шаардлагыг хүлээн аваагүй. УИХ-ын гишүүд бид Д.Амарбаясгаланг төрийн эрх барих дээд байгууллагыг удирдах улс төрийн болон ёс суртахууны эрхгүй гэж үзэж байна. Иймд Д.Амарбаясгаланг УИХ-ын даргаас огцруулах саналыг үүгээр гаргаж байна.
Монгол Улсын Их Хурлын тухай хуулийн 12-ын 2.3 дахь заалтад УИХ-ын нийт гишүүний олонх УИХ-ын даргыг огцруулах үндэслэл бүхий санал гаргасныг УИХ-д хүлээн зөвшөөрсөн гэж мөн хуулийн 12-ын 3 дахь хэсэгт хуралдаанд оролцсон гишүүдийн олонх дэмжсэн тохиолдолд уг тогтоолыг баталсанд тооцно гэж хуульчилсан байдаг.
Уг албан бичигт МАН-ын 34, АН-ын 31, бусад нам эвслээс 2 буюу нийт 67 гишүүн гарын үсэг зурсан.
Уг албан бичгийг одоо УИХ-ын дэд дарга Х.Булгантуяад гардуулах гэж байна” гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
