Энэ онд 16 километр авто замд борооны ус зайлуулах шугам угсрахаас 8.6 километрийг гүйцэтгэжээ

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хот 1,260 гаруй километр хатуу хучилттай авто замтай. Гэтэл үүний 23.6 хувь нь буюу 300 километр орчим нь борооны ус зайлуулах шугамтай байна.

Сүүлийн хоёр жилийн хугацаанд буюу 2024, 2025 онд нийт 40 орчим километр орчим борооны ус зайлуулах шугам хоолойг шинээр угсарчээ.

НЗДТГ-ын хэвлэлийн хэлтсээс мэдээлснээр 2024 онд ус ихээр тогтдог 15 байршилд 27 километр авто замын борооны ус зайлуулах шугам угсарсан бол энэ онд 10 байршилд 16 километр авто замд шугам угсрахаар төлөвлөснөөс өнөөдрийн байдлаар найман байршилд 8.6 километр авто замын борооны ус зайлуулах шугам хоолойг угсарчээ. Харин хоёр байршлын шугамыг он дамжин буюу ирэх онд угсарч дуусгах юм байна. 

Борооны ус зайлуулах шугамтай болсон байршлууд:

1. ХУД-ийн 15-р хороо, Энхтайвны гүүрний доод хэсгийн зам талбайн ус зайлуулах шугамын ажил
2. БГД-ийн 5-р хороо, Алтай хотхоны 14-р байр орчмын борооны ус зайлуулах шугамын ажил
3. БГД-ийн 24, 26-р хороо Энгельсийн гудамжны авто замын борооны ус зайлуулах шугамын шинэчлэл, өргөтгөлийн ажлын зураг төсөл
4. ХУД-ийн 3-р хороо, ТЭЦ-3-ын арын уулзвараас Дунд голын гүүр хүртэлх борооны ус зайлуулах шугамын ажил
5. ЧД-ийн 2-р хороо, Хувьсгалын гудамжны борооны ус зайлуулах шугам
6. СХД, Драгон орчим
7. БЗД-ийн Нарт хотхон, Нарантуул захын зүүн талд

8. БГД, Гандан орчимд.

Борооны ус зайлуулах шугамыг ирэх онд үргэлжлүүлэн угсрах хоёр байршил:

1. БГД-ийн 4-р хороо, Төмөр замын авто зогсоол орчимд
2. ХУД-ийн 3, 5-р хороо, Чингисийн өргөн чөлөө.

2026 онд ГУББГ-аас ус тогтдог байршлуудад нийт 30 километр урт борооны ус зайлуулах шугам угсрахаар төлөвлөжээ.