Н.Тавинбэх: Энэ өвлийн оргил ачаалал тооцоолсон хэмжээнээс давахгүй бол цахилгаан эрчим хүч хязгаарлахгүй
Засгийн газрын өнөөдрийн хуралдаанаар “Дулааны гуравдугаар цахилгаан станц (ДЦС-3)” ТӨХК-д хийгдэж байгаа сэргээн босголтын ажлын явцын талаар мэдээлэл сонссон байна.
Энэ талаар ДЦС-3-ын бүрэн эрхт төлөөлөгч Н.Тавинбэх мэдээлэл өгөв. Тэрбээр "ДЦС-3-ын турбин генератор дээр энэ оны зургаадугаар сарын 2-ны өдөр томоохон хэмжээний гэмтэл гарсан.
Тус гэмтлийг арилгаж, хэвийн схемд оруулах хүрээнд таван багц ажлыг хийж гүйцэтгэх учиртай. Таван багц ажлын гуравыг өвлийн оргил ачааллаас өмнө дуусгах ёстой бөгөөд 90 орчим хувийн гүйцэтгэлтэй байна.
Энэ жил хийх ёстой гурван ажлаа бүрэн дуусвал уг станц дулаан үйлдвэрлэлийн хувьд өнгөрсөн оны өвлийн оргил ачааллын үеийнхээ хэмжээнд хүрнэ. Харин цахилгаан эрчим хүчний үйлдвэрлэлийг өнгөрсөн оны мөн үед үйлдвэрлэж байсан түвшний 50 орчим хувьд тэнцэх хэмжээнд үйлдвэрлэл явуулж хэрэглэгчдэд хүргэх техникийн боломжтой болно.
Үлдсэн хоёр ажлыг ирэх оны өвлийн их ачааллаас өмнө дуусгахаар ажиллаж байна. Шинэ тоног төхөөрөмж үйлдвэрлэх, тээвэрлэх, барилга угсралтын ажлын хугацааг үндэслэн тооцсон хугацаа юм. Засгийн газрын зүгээс шуурхай арга хэмжээ авч, сэргээн босголтын ажилд шаардлагатай санхүүжилтийг шийдэж өгсөн.
Цахилгааны эрчим хүчний хувьд өнгөрсөн оны мөн үеийн 50 хувьтай тэнцэх хэмжээнд үйлдвэрлэнэ. Дутаж буй 50 хувийг шинэ эх үүсвэрээс хангахаар ажиллаж байна. Нэг турбин генераторыг хямд зардлаар шийдвэрлэнэ гэж тооцвол 30-50 орчим тэрбум төгрөг шаардлагатай.
Өвлийн оргил ачаалал тооцоолсон хэмжээнээс давахгүй бол цахилгаан эрчим хүчний хувьд хязгаарлалт хийгдэхгүй" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
